د طالبانو د دفاع وزیر ملا یعقوب نن چهار شنبه د (سلواغې ۱۸مه) په کابل کې د اسلامي نظام او ملي یووالي د پیاوړتیا تر سرلیک لاندې ولسي غونډې ته د وینا پرمهال وویل چې د ملي یووالي لپاره کار کوي؛ خو په تېرو حکومتونو کې ملي یووالی یوازې تر شعاره محدود پاتې و.
د طالبانو د دفاع وزارت سرپرست مولوي محمد یعقوب مجاهد په کابل کې د اسلامي نظام او ملي یووالي د پیاوړتیا تر سرلیک لاندې یوې غونډه کې ویلي، چې ملي یووالی تر شعاره نه پرېږدي او په عمل کې یې ثابتوي.
نوموړی وايي:« دلته خلکو د ملي یووالي جوړېدو ته کار نه کاوه؛ بلکې د ملي بېلوالي لپاره یې کار کاوه.»
نوموړي د خپلو خبرو پر مهال وویل، هر هغه څوک او ډله چې فتنې او د قومونو تر منځ بېلوالي ته لمن وهي په وړاندې یې په کلکه درېږي.
که څه هم نوموړي په مستقیم ډول د کوم سیاسي ګوند یا ډلې نوم وا نخیست؛ خو څو ورځې وړاندې د افغانستان یو شمېر سیاستوالو په افغانستان کې د فډرالیزم نظام د رامنځته کېدو غوښتنه کړې وه.
دغه طالب چارواکي نړۍوالو ته په اشارې وویل: د افغانانو د ځورولو لپاره مو هر کار وکړ نور افغانان پوه شوي دي او دا یې درک کړې ده، چې هیڅ بهرنی هېواد او نه کومه بله استخباراتي کړۍ نه شي کولای چې موږ ته خوشحالي وبخښي او ستاسو اعمال یې لیدلي. تاسو نه شئ کولای افغانان وغولوئ د افغانانو ازادي او ملي ګتې باید و پېژنئ.
نوموړی خبرداری ورکوي او وايي، هر څوک که دا هڅه کوي چې د افغانستان خلکو امنیت او اقتصاد خراب کړي او یا هم په سیاسي لحاظ پر هغوی فشارونه راوړي، نتیجه نه ورکوي.
مولوي یعقوب وايي، د نړۍوالو له لوري د بندیزونو او محدودیتونو په لګولو سره افغانان نور هم سره نږدې او یو موټی کېږي.
