د ملګرو ملتونو د وګړو صندوق د پنجشنبې په ورځ (د سلواغې ۱۹مه) په خپله ایکس پاڼه لیکلي چې د افغانستان په لرو پرتو سیمو کې تر ټولو زیاتې ښځې د زیږون پرمهال مري.
د دغه بنسټ په وینا، په لرو پرتو کلیو کې ډېری ښځې روغتیايي خدمتونو ته لاسرسی نه لري.
په ورته وخت کې، د ملګرو ملتونو د وګړو صندوق خبر ورکړی چې په لرې پرتو سیمو کې د میندوارو میندو او د ماشوم ډاډمن زیږون په موخه له ښځو سره د مرستې لپاره روغتیایي کورونه جوړوي.
د روغتیا نړیوال سازمان د تازه شمېرو له مخې، په افغانستان کې د هرو ۱۰۰ زرو زیږونونو له ډلې ۶۳۸ ښځې مري.
همدارنګه په افغانستان کې د ښې روغتیا په برخه کې د نادولتي موسسو له خوا د ورکړل شویو شمېرو له مخې شاوخوا ۴۰ سلنه افغان مېرمنې په کور کې زیږون کوي، خو په لرو پرتو سیمو کې دا شمېره ۸۰ سلنې ته رسېږي.