په دوحه کې د افغانستان په اړه د ملګرو ملتونو د ناستې په درشل کې د "ښځو ازادۍ غورځنګ" په نوم د افغان ښځو یوې نوې ډلې خپل شتون اعلان کړ. د ښځو د ازادۍ غورځنګ د افغانستان د خلکو په ځانګړې توګه د ښځو اوسني وضعیت ته په اشارې سره له نړیوالې ټولنې وغوښتل چې طالبان په رسمیت و نه پيژني.
یادې معترضې میرمنې نن افغانستان انټرنېشنل ته د یوې ویډیو په لیږلو سره همداراز د دوحې په ناسته کې د ښځو د ریښتینې استازې د حضور غوښتنه کوي.
د ښځو د ازادۍ غورځنګ د «ښځې، ازادۍ او سولې» په شعار سر په دغه ویډیو کې له نړۍ غواړي چې افغان ښځې هیرې نه کړي.
د دوی په خبره، طالبان له خپلو ټولو محدودیتونو سره سره د حجاب په پلمه ښځې نیسي او بندي کوي.
پر افغانستان د طالبانو له واکمنۍ وروسته د ښځو د حقونو د دفاع په موخه څو ډلې په هیواد دننه او بهر کې جوړې شوې ديی ډډې ته کول، او په بیلابیلو پروګرامونو سره د ښځو ملاتړ کوي، خو نه یوازې دا چې د ښځو ستونزو ته رسیدګي نه ده شوې د طالبانو له خوا پرې محدویتونه زیات شوي هم دي.
د ۲۰۲۱ کال د اګسټ له ۱۵مې راهیسې د ښځو او نجونو ښوونه او روزنه، په کار ځای، عامو ځایونو کې ددوی ګډون او د ورځني ژوند په نورو اړخونو کې په تدریجي ډول د محدودیتونو لګول او په ډیرو مواردو کې ان په بشپړه توګه له مینځه وړل هغه څه دي چې په کور دننه او بهر کې له پراخو غبرګونونو سره مخ شوی دی.
