د پاکستان لنډمهاله لومړي وزیر انوار الحق کاکړ او د ټاکنو د خپلواک کمېسیون مشر خلکو ته د ټاکنو د بریالي ترسره کېدو مبارکي ویلې او ډاډ یې ورکړی، چې د ټاکنو پایلې به په راڼه ډول وشمېرل شي او له خلکو سره به شریکې شي.
په پاکستان کې پرونۍ ټاکنې داسې مهال ترسره شوې، چې د دغه هېواد په بېلابېلو برخو کې امنیتي حالات ترینګلي وو او له خلکو سره هم د تاوتریخوالي د پېښو اندېښنې زیاتې وې.
د ځینو رپوټونو له مخې، پرون د ټاکنو په بهیر کې د پاکستان د مخالفو وسلهوالو ډلو لهخوا تر پنځوسو زیات بریدونه شوي چې مرګ ژوبله یې هم له ځانه سره لرله.
د پوځ لهخوا په خپره شوې خبرپاڼه کې ویل شوي، چې د مخالفینو دغه بریدونه یې په شا تمبولي او دا یې منلې چې په پرونیو بریدونو کې د دوی لس تنه امنیتي سرتېري وژل شوي دي.
دا رنګه په خبرپاڼه کې راغلي، چې له بلې غاړې پنځه کسان وژل شوي او ۳۹ تنه نور یې ټپیان شوي دي.
د پاکستان د پرونیو ټاکنو د امنیت د خوندیتوب لپاره شپږ لکه امنیتي ځواکونه ګومارل شوي وو، چې په دوی کې د پوځ تر څنګ پولیس او ملیشه ځواکونو هم برخه لرله.
د تاوتریخوالي د پېښو تر څنګ پرون په ټول پاکستان کې انټرنېټي خدمتونه او ګرځنده ټیلیفونونه بند شوي وو، چې دې کار هم د ګڼو خلکو او سیاسي ګوندونو نیوکې راپارولې وې؛ خو د پاکستان د کورنیو چارو وزارت ویلي، چې دا ګام یې یوازې د نا امنیو د مخنیوي په پار اخیستی و.
