د پولیو د تشخیص دغه لابراتوار د بېل ګېټس بنسټ، روغتیا نړۍوال سازمان او د پولیو د لابراتوارونو د نړۍوالې شبکې په ملاتړ جوړ شوی دی.
د طالبانو د عامې روغتیا چارسمبالي وزیر قلندر عباد ویلي، دا لومړی ځل دی چې په افغانستان کې د پولیو (ګوزڼ) د تشخیص لابراتوار پرانیستل کېږي.
هغه زیاته کړې، چې د عامې روغتیا وزارت د پولیو د له منځه وړلو په برخه کې جدي ګامونه اخیستي او موخه يې دا ده، چې په ۲۰۲۴ زېږدیز کال کې په افغانستان کې پوليو له منځه يوسي.
د هغه په وینا، د دوی له بيا واکمنېدو وروسته د افغانستان په روغتیايي سکټور کې د پام وړ بدلون راغلی او په ځانګړي ډول د لومړنیو، ثانوي او ثالثي روغتیايي خدمتونو په برخه کې او د پولیو پېښې د پخوا پرتله کمې شوې دي او په دې برخه کې هڅې روانې دي.
خو تر دې وړاندې طالبانو د پولیو د واکسیناسیون د کمپاینونو کارکوونکي په نښه کول او د ګوزڼ ضد ناروغۍ واکسین یې د نړۍوالو دسیسه او هغه یې حرام بلل.
د طالبانو تر کنټرول لاندې باختر اژانس بیا لیکلي:« د ختیځې مدیترانې سیمې لپاره د روغتیا نړۍوال سازمان د پولیو د برخې مشر ډاکټر حمید جعفري د دې لابراتوار پرانیسته د پولیو د تشخیص او د له منځه وړلو په برخه کې یوه ستره لاسته راوړنه وګڼله او په راتلونکې کې يې د افغانستان سره د روغتیايي سکټور په برخه کې د لا ډېرو همکاريو ډاډ څرګند کړ.»