د اوکراین پر خارکیف د روسیې د بې پیلوټه الوتکو برید د ماشومانو په ګډون اوه کسان وژلي دي

AP ۱۴۰۲ سلواغه ۲۱

اوکرایني چارواکي وايي، چې د دغه هېواد په دویم لوی ښار، خارکیف کې د روسیې د بې پیلوټه الوتکو په برید کې د درېیو ماشومانو په ګډون اوه کسان وژل شوي دي.

اسوشییټډ پریس خبري اژانس د رپوټ له مخې، د خارکیف والي اولیه سینیهوبوف ویلي، درې نور کسان په دغه برید کې ټپیان شوي دي.

هغه ویلي، چې لږ تر لږه لس روسي بې پیلوټه الوتکو په خارکیف ښار برید کړې چې اته یې د هوايي دفاعي سیسټم له خوا رانسکورې شوي دي. په دغه برید کې د خارکیف ښار په نیمیشلان ولسوالۍ کې د تېلو د یوې ذخیرې په ګډون ملکي ځایونه په نښه شوي او ستره اورلګیدنه رامنځ‌ ته شوې ده،‌ چې ۱۵ شخصي کورونه یې سوځولي دي.

د دغه ښار د ملي پولیسو د تحقیقاتي څانګې مشر، سرهي بولوینوف، په فیسبوک ټولنیزې شبکې د ځایي اوسیدونکو په حواله لیکلي: «ریښتینی دوزخ یې لیدلی، لومړی د تېلو ذخیره په نښه، ټول تېل خواره او ورسته بیا هر څه اور واخیست.»

د ښاغلي بولوینوف په وینا، په برید کې یوه پنځه کسيزه کورنۍ چې د اوو او څلورو کلونو او نهو مياشتو عمر لرونکي ماشومان پکې شامل و، ژوندي وسوځیدل. دغه کورنۍ د اورلګیدنې پر مهال په خپل کور کې بنده پاتې وه. هغه زياته کړې، چې د اور لګېدنې له امله په يوه بل کور کې دوه ماشومان هم وژل شوي دي.

د همدې پیښې په اړه په یوه راپور کې رویټرز خبري‌ اژانس ویلي، چې په برید کې یوه اوکراینۍ څارنواله، د هغې میړه او د هغوی درې واړه ماشومان ووژل شوي دي.

نور خبرونه

رادیو

ستاسو د غږ لپاره کور

خپل فلمونه او غږونه را ولېږئ