د پښتون ژغورنې غورځنګ هالند ځانګې د یوې غونډې په جوړولو سره په پاکستان کې د دغه غورځنګ د مشر او غړو نیول او «شکنجه» کول وغندل.
د غونډې کډونوالو د بشري حقونو پر نړيوالو سازمانونو غږ وکړ، چې پر پاکستاني پوځ فشار راوړي ترڅو په دغه هېواد کې د پښتنو نیول ودروي.
د پښتون ژغورنې غورځنګ د هالند څانګې تېره ورځ شنبې د سلواغې ۲۱ مه یوه غونډه جوړه کړې وه.
د غونډې کډونوالو په پاکستان کې له پښتنو غوښتنه وکړه چې د خپلو حقونو ترلاسه کولو لپاره د پښتون ژغورنې غورځنګ سره ودریږي.
دوی وویل زندانونه نشي کولی چې د غورځنګ د غړو مسیر ته بدلون ورکړي.
پاکستان په دې وروستیو کې د پښتون ژغورنې غورځنګ مشر منظور پښتین او د دې غورځنګ مخکښ غړی ګیلامن وزیر او څو نور غړي نیولي او ځینې یې وايي چې زندان کې سخت شکنجه شوي دي.
د غونډې جوړونکو افغانستان انټرنشنل ـ پښتو ته وویل چې دوی په دغه غونډه کې د ارمان لوڼي د شهادت پنځم تلین هم ولمانځه.
د دې غونډې په ورستۍ برخه کې د ارمان لوڼي خور وړانګې لوڼۍ د سکایپ د لارې له ګډونوالو یې غوښتنه وکړه ترڅو د ارمان لوڼي فکر او د مبارزې لار تعقیب کړی.