په فیلیپین کې د ځمکې ښویېدو په پېښه کې د مړو شویو کسانو شمېر ۵۴ ته ورسېد

AP ۱۴۰۲ سلواغه ۲۲

فیلیپیني چارواکو د يکشنبې په ورځ رویټرز خبري اژانس ته ویلي،‌ چې د فليپين په سویلي برخه کې د ځمکې د ښويېدو له امله د مړو شويو کسانو شمېر ٥٤ تنو ته رسېدلى دى. د ژغورنې کارکونکي له خټو څخه د نورو مړو د راویستلو لپاره لا هم کار کوي.

د ځمکې ښویېدنې پېښه د سې شنبې په شپه د داواو دي اورو ولایت په ماکو ښارګوټي کې د سرو زرو کان ته نږدې رامنځته شوې وه، چې له امله یې کورونه او هغه موټرونه د خاورو او خټو لاندې ښخ شوي وو، چې د کان کارکوونکې یې سیمې ته لیږدول.‌

د داواو دي اورو ولایتي ادارې په یوه فیسبوکي پوسټ کې ویلي، چې د ځمکې ښویېدنې له امله د مړو شویو کسانو شمېر ۵۴ ته رسېدلی.

تر دې وړاندې د مړو شویو کسانو شمېر ۳۷ ښودل شوی و؛ خو د ژغورنې کارکوونکو وروسته بیا نور مړي هم موندلي دي.

په دې پېښه کې د لادرکه شویو کسانو شمېر هم ۶۳ تنو ته رسېدلی دی. په همدې حال کې د ځمکې ښویېدنې له امله ټولټال ۳۲ تنه ټپیان شوي هم دي.

د داواو دي اورو ولایت یو چارواکي اډوارډ مکاپيلي ویلي، چې د ژغورنې په عملیاتو کې تر ۳۰۰ ډېر کسان برخه لري؛ خو د سختو بارانونو، خټو او د ځمکې د ښویېدو د ګواښ له امله عملیات له خنډ سره مخامخ دي.

ماکاپیلي زیاته کړې، چې د ژغورنې عملیات د یکشنبې په سهار بیا پیل شوي دي.

نور خبرونه

رادیو

ستاسو د غږ لپاره کور

خپل فلمونه او غږونه را ولېږئ