د هرات روغتون مسوولانو د یکشنبې په ورځ ویلي، چې تېر یوکال په دغه روغتون کې د سرطاني ناروغیو سلګونه ناروغان بستر شوي دي. د هرات حوزوي روغتون د سرطان برخې مشر د طالبانو تر لاس لاندې باختر اژانس ته ویلي چې په يو کال کې دغه روغتون د شپږ زره او ۵۰۰ تنو سرطاني ناروغانو درملنه کړې.
فاروق احمد صديقي د طالبانو باختر اژانس خبريال ته ویلي: «په ښځو کې د سينې سرطان او په نارينه وو کې د مرۍ سرطان یې تر ټولو عام ډولونه دي.» هغه زیاته کړه چې دغه «دغه ناروغۍ دېرش سلنه زیاته شوې ده.»
هغه ویلي، چې دغه روغتون د سرطان د تشخيص او درملنې لپاره کمې اسانتياوې لري.
د ۲۰۲۲ کال د فبرورۍ په میاشت کې د طالبانو د روغتیايي چارواکو د شمېرو له مخې، په افغانستان کې هر کال تر ۴۰ زرو ډېر کسان په سرطان ناروغۍ اخته کېږي او له ۱۶ تر ۲۰ زرو پورې کسان د دغې ناروغۍ له امله خپل ژوند له لاسه ورکوي.
