وروسته له هغې چې امریکا د ملګرو ملتونو د امنیت شورا په غونډه کې د حماس او اسراییل تر منځ د اوربند درېیم پرېکړه لیک ویټو کړ، د روسیې استازي واسیلي نیبنزیا ویلي، چې واشنګټن اسراییل ته په غزه کې د انسانانو د وژلو جواز ورکوي.
نوموړي ویلي، چې الجزایر د خپل پرېکړه لیک د مسودې د چمتو کولو لپاره په ښه نیت بحثونه تنظیم کړل؛ مګر امریکا د دغه پرېکړه لیک په ویټو کولو سره وویل، چې مسوده خطرناکه ده ځکه چې دا به د روانو خبرو اترو خنډ شي.
د روسیې استازی زیاتوي، چې په حقیقت کې واشنګټن پر دې ټینګار کوي، چې امنیت شورا دې د امریکا په پلانونو کې لاسوهنه ونه کړي.
په ملګرو ملتونو کې د امریکا دایمي استازې لینډا توماس ګرینفیلډ ویلي، چې د اوربند د پرېکړه لیک تصویبول به د اوسنیو خبرو اترو پر وړاندې خنډ شي.
هغې وویل: "د امنیت شورا هر اقدام باید د دې خبرو اترو سره سم وي، نه د دوی خنډ."
د دې پرېکړه لیک لومړنۍ مسوده د الجزایر له خوا د ملګرو ملتونو د امنیت شورا ته وړاندې شوې وه.
