سرچینې: طالبانو د کابل ښار په لویدیځ کې یو ځوان په ډزو وژلی دی

دسرچينو له مخې الياس مهري په خپل کور کې وژل شوى دى؛ خو په شپږمه حوزه کې طالبان وايي، چې ځانوژنه يې کړې ده.

سیمه ییزو سرچینو افغانستان انټرنشنل ته ویلي؛ الیاس مهري په اصل کې د میدان وردګو ولایت د بهسودو ولسوالۍ د دویمې برخې اوسېدونکی دی او د کابل ښار شپږمې امنیتي حوزې ته مخامخ په یوه کور کې اوسېده.

دوی وايي؛ دغه ځوان په مستقيم ډول د غاړې له شا څخه په مرميو لګېدلی او وژل شوی دی.

د الیاس کورنۍ ته یوې نږدې سرچینې د افغانستان انټرنشنل ته ویلي، چې طالبانو هغه بې دلیله وژلی دی.

هغه د الیاس د ځان وژنې په اړه د طالبانو ادعا تر پوښتنې لاندې راوسته او ویې ویل، چې څنګه یو سړي له شا څخه ځان ویشتلی شي.

هغه د الیاس مهري عکسونه لیږلي، چې د هغه د غاړې په شا کې یو کوچنی سوري ښیې چې د مرمۍ نښه ده.

سرچينې د الياس مهري د جنازې انځورونه رالېږلي او ويلي يې دي، چې نن چهارشنبه خاورو ته وسپارل شو.