د طالبانو تر کنټرول لاندې د ملي ټلویزیون په راپور کې راغلي،چې دغه شرکت له ازبکستانه د وارداتي برېښنا د بشپړې پرې کېدو خبره رد کړه. د طآلبانو تر کنټرول لاندې برېښنا شرکت ویلي، چې د ځینو تخنیکي ستونزه له کبله د ازبکستان وارداتي برېښنا ۵۰ سلنه کمه شوې؛ خو په بشپړ ډول نه ده پرې شوې.
د دغه شرکت ویاند حکمت الله میوندي ویلي، چې د اړوندو مسوولینو سره د ستونزې د حل لپاره خبرې روانې دي او تر جوړېدو به یې له بدیلو حل لارو کار اخلي.
له بل پلوه وړمه ورځ په دغه شرکت کې ځینو سرچېنو افغانستان انټرنشنل ـ پښتو ته ویلي و، چې ازبکستان پر افغانستان وارداتي برېښنا په بشپړه توګه پرې کړې ده.
دا خبرې داسې مهال راپورته کېږي، چې همدا څو ورځې دمخه د طالبانو د برېښنا شرکت ویلي و چې ازبکستان ته یې د برېښنا خپل ټول پورونه پرې کړې دي.
وړمه ورځ د افغانستان برېښنا شرکت لهخوا په خپره شوې خبرتیا کې راغلي و، چې د سلواغې په ۳۰مه ازبکستان پر افغانستان ۵۰ سلنه وارداتي برېښنا کمه کړه.
خبرپاڼې زیاته کړې وه، چې د پلازمینې کابل سربېره د خلم او خنجان سب سټېشنونو ترڅنګ د سمنګان، پروان، کاپیسا، پنجشیر، ننګرهار، لغمان، غزني، میدان وردګ، لوګر، پکتیا او خوست ولایتونو کې د برېښنا پرچاوۍ ډېرې شوې دي.
له بل پلوه کابل مېشتي هم په تېرو وروستیو کې په پلازمېنه کې د پرچاوۍ له امله سر ټکوي.
دوی وایي، په سوړ ژمي کې په ساعتونو، ساعتونو د برېښنا نشتون له ستونزو سره مخامخ کړي دي.
