په پاکستان کې د سیاسي ګوندونو ترمنځ د یوه ګډ حکومت جوړولو د هڅو په غبرګون د دغه هېواد د پخواني لومړي وزیر عمران خان د پاکستان تحریک انصاف ګوند د پنجشنبې په ورځ وویل، چې د ملي اسمبلۍ په ځانګړو څوکیو کې برخه اخیستل د هغوی "قانوني حق" دی.
پيټيای د دوشنبې په ورځ اعلان وکړ، هغه نوماندانو چې په ټاکنو کې یې په خپلواکه توګه برخه اخیستې وه او بریالي شوي، د سني اتحاد شورا ګوند سره به یوځای شي؛ ترڅو د ملي اسمبلۍ په څوکیو کې برخه واخلي.
د پيټيای وياند شعيب شاهين وایي:« دا زموږ قانوني حق دی، چې په ملي اسمبلۍ او ټولو څلورو صوبايي اسمبلیو کې په ځانګړو څوکيو دعوه وکړو او په کې برخه واخلو.»
هغه وایي، د سني اتحاد شورا ګوند په ملي اسمبلۍ کې ۲۷ ځانګړې څوکۍ ترلاسه کړي چې د دغو څوکیو د محرومولو لپاره هیڅ دلیل یا کوم قانوني جواز نه لیدل کېږي.
د پاکستان د ملي اسمبلۍ په ۳۳۶ کسیزه جرګه کې ۷۰ مخصوصې څوکۍ دي، چې په کې ۶۰ د ښځو او ۱۰ د مذهبي لږکیو لپاره دي. دغه څوکۍ په انډولیزه توګه پارلماني ګوندونو ته ځانګړې شوې دي.
