په خوست کې د پنځو لوبډلو «خوست، ننګرهار، کابل، پروان او لوګر» ترمنځ د سوکيوکشين کراټې لومړي پړاو سيالۍ تر سره شوې. د افغانستان د طالبانو د ورزش او بدنې روزنې اداره وايي، چې په دې سياليو کې ۵۰ لوبغاړو برخه اخیستې وو.
د طالبانو د ورزش او بدنې رونې ادارې نن دوشنبه په خوست کې د دې سياليو د ترسره کېدو خبر ورکړی.
په دې يو ورځنۍ سيالۍ کې کوربه خوست لوبډلې د ۱۴ برياو په ترلاسه کولو لومړۍ، ننګرهار په دوو برياو سره دویم او کابل لوبډلې د يوې بريا په ترلاسه کولو درېیم مقام ګټلی.
د ادارې د معلوماتو له مخې، چې د سياليو څخه يې موخه د غوره لوبغاړو ټاکل دي.
مسوولين وايي؛ غواړی د ایران د سوکيوکشين کراټې په سياليو کې د ګډون لپاره منتخبه افغان لوبډله وټاکي.
طالبانو برياليو لوبغاړو ته ورزشي جايزې هم ورکړې.
