د طالبانو سترې محکمې په یوه خبرپاڼه کې ویلي، چې په هرات کې د دغې ډلې د نظامي محکمې د پرېکړې پر بنسټ یې، اته تنه د دغې محکمې په انګړ کې د «وهلو او سپکاوي» په تور په سزا رسولي. په خبرپاڼه کې راغلي چې دغه کسان په پنځو مياشتو تنفیذي بند او شل دورو محکوم شوي دي.
د طالبانو د سترې محکمې په خبرپاڼه کې د دغو کسانو د تورونو په اړه نور معلومات نه دي ورکړل شوي.
دغه حکم په هرات کې د طالبانو د نظامي محکمې له خوا صادر شوی و، خو معلومه نه ده چې تورن کسان د طالبانو د ډلې غړي وو او که نه.
تر دې مخکې په هرات کې د طالبانو نظامي محکمې د خالد قادري په نوم یو شاعر په یو کال بند محکوم کړی و.
په افغانستان کې واک ته تر رسیدو وروسته، په دغه هېواد کې د جسمي سزاګانو لکه د په دورو وهلو، د لاسونو پرې کول او اعدام سزاګانې بیا پیل شوي دي.
د بشري حقونو ملاتړو سازمانونو او نړیوالې ټولنې له طالبانو غوښتي چې د جسمي سزاګانو مخه ونیسي چې د انساني کرامت خلاف او ظالمانه عمل دی. طالب چارواکو ویلي، چې دوی اسلامي شریعت نافذوي او دغه سازمانونه او هېوادونه باید د افغانستان په کورنیو چارو کې لاسوهنه ونه کړي.
