د سپینې ماڼۍ پخوانۍ چارواکې لیزا کورټیس وايي، واشنګټن باید د دوحې له تړون څخه لاس واخلي او له طالبانو سره د «مشروط جوړجاړي» نوې لارې ولټوي. هغې له افغانستان انټرنشنل سره په خبرو کې د دوحې تړون «ډېر کمزوری» وباله، چې د دې په خبره طالبانو ته يې ګټه رسولې ده.
لیزا کورټیس د ۲۰۲۰ کال په فبرورۍ کې د دوحې د تړون د لاسلیک پر مهال د ډونلډ ټرمپ د ادارې له لوړ پوړو پالیسي جوړونکو څخه وه او د افغانستان په اړه یې د امریکا په پالیسۍ کې رول لوبولی و.
هغې د افغانستان انټرنشنل خبریالې صمصامه سیرت سره په مرکه کې وویل چې د دوحې تړون «د طالبانو لپاره خورا ګټور و» او ان له دغې ډلې یې نه دي غوښتي چې له ترهګرو ډلو سره اړیکې پرې کړي.
د هغې په وينا، له طالبانو سره د دوحې تړون يوازې له دې ډلې غوښتي، چې ترهګرو ته اجازه ور نه کړي، چې د امريکا پر ګټو بريدونه وکړي.
هغه وايي چې دغه «ډېر کمزروي» تړون طالبان لا زړور دي.
لیزا کورټیس وویل: «د دوحې د تړون څلورم کال دی، دا به یوې خواته پرېږدو، زه فکر کوم چې د دې وخت را رسېدلی چې له طالبانو سره د اړیکو لپاره نوې لارې ولټوو، او د یوه مشروط جوړجاړي له لارې پر دوی (طالبانو) فشار واچوو چې دوی د ښځو او نجونو حقونو ته درناوی وکړي.»
د سپینې ماڼۍ دغې پخوانۍ چارواکې ټینګار کړی، چې د دوحې تړون په افغانستان او سیمه کې د امریکا امنیتي ګټې نه دي خوندي کړې او په افغانستان کې د ترهګرۍ ګواښونه هم زیات شوي دي.
اغلې کورټیس وویل چې د داعش خراسان څانګه د نړیوال ګواښ په توګه پیاوړې کیږي او همدارنګه په افغانستان کې د تحریک طالبان پاکستان او د منځنۍ اسیا ځینې ترهګرې ډلې د لا ځواکمنېدو په حال کې دي.
د سپینې ماڼۍ دغې پخوانۍ چارواکې ویلي، چې د دوحې د تړون له لاسلیک وروسته امریکا «خوندي نه ده» او په ښه حالت کې هم نه ده.
هغې ټینګار وکړ چې نړیواله ټولنه کافي کار نه کوي چې طالبان د دوی د چلند او کړنو له امله ځواب ورکولو ته حاضر کړي.د امریکا او طالبانو ترمنځ د دوحې تړون د ۲۰۲۰ کال د فبرورۍ په ۲۹ لاسلیک شو.دغه تړون د زلمي خلیلزاد په مشرۍ د امریکايي پلاوي او د ملا برادر په مشرۍ د طالبانو د پلاوي ترمنځ له اتلسو میاشتو خبرو اترو وروسته شوی دی.
