دغه ماشوم چې یوه میاشت وړاندې د کندهار ښار له پنځمې ناحیې څخه تښتول شوی و، پرون یې مړ جسد وموندل شو.
د دغه ماشوم د کورنۍ غړو په کندهار کې رسنیو ته ویلي، چې ماشوم مزمل نومېده او مړی یې پرون د کندهار د پنځمې ناحیې په سالون خان چمن کې د یوه پله لاندې موندل شوی دی.
د ماشوم د کورنۍ غړي وايي، تښتوونکو ماشوم پخوا وژلی و او مړی یې دوی وروسته په داسې مهال وموند چې د بدن غړي یې وراسته شوي وو.
دا چې دغه ماشوم چا او له کومه ځایه تښتولی و، د کورنۍ غړي یې په اړه څه نه وايي.
تر دې وړاندې هم له کندهاره د ورته پېښو راپورنه خپاره شوي وو؛ خو طالبان یې په اړه رسنیو ته څه نه وايي.
کندهار چې د طالبانو اصلی مرکز او د دوی د مشر استوګنځای بلل کېږي او له همدغه ولایته سترې، سترې پرېکړې هم کېږي؛ خو بیا هم هلته دغسې پېښې کېږي او تر ډېره له رسنیو ځینې پټې ساتل کېږي.
طالبانو تل د خپلې واکمنۍ پر مهال د امنیت د ټینګښت خبرې کړي او هغه یې د خپلې واکمنۍ سترې لاسته راوړنې یادې کړې دي؛ خو دغه شان پېښې ډېرې زیاتې پېښیږي او رسنۍ یې له ډاره په اړه له راپور ورکولو ډډه کوي.