د افغانستان لپاره د اروپايي ټولنې ځانګړی استازی توماس نیکولسن له نږدې اونۍ ځنډ وروسته وايي، دا ټولنه په غزني او جوزجان کې د طالبانو وروستي درې اعدامونه په کلکو ټکو غندي. توماس نیکولسن نن خپل اېکس کې زیاتوي، اروپايی ټولنه په هر ډول شرایطو او حالاتو کې د اعدام د سزا مخالفه ده.
د نوموړي په خبره، د مدني او سیاسي حقونو نړیوال میثاق شپږمې او اومې مادې له مخې د خلکو په مخ کې اعدام د نړیوالو حقونو هیڅ معیار سره برابر نه دی او دغه ډول اعدام سپکوونکی او د انساني حیثیت خلاف بولي.
طالبانو تېره دوشنبه په جوزجان کې یو کس په یوه لوبغالي کې اعدام کړ. تر هغه پنځه ورځې مخکې یې هم دوه کسان د غزني ښار په یوه لوبغالي قصاص کړل.
د طالبانو دغه اعدام باندې پر نورو بشري حقونو ادارو سربېره ملګرو ملتونو او د بښنې نړیوال سازمان هم نیوکه وکړه.
په غزني کې د طالبانو تر اعدام وروسته په همغه ورځ د افغانستان لپاره د ملګرو ملتونو ځانګړي دفتر یا یوناما وویل، چې ملګري ملتونه د اعدام د مجازاتو مخالف دي.
یوناما په خپل اېکس کې له طالبانو غوښتي چې ژر تر ژره د اعدام مجازات لغوه کړي.
تر یوناما یوه ورځ وروسته د بښنې نړیوال سازمان هم پر طالبانو غږ وکړ چې سملاسي د اعدام سزا بنده او ټول اعدامونه لغوه کړي.
دې سازمان اعدام د نړیوالو قوانیو خلاف او نه زغمېدونکی بللی دی، خو طالبان وايي، چې دا هرڅه د اسلامي شریعت په چوکاټ کې او د نورو خلکو د عبرت لپاره کوي.
ورته مهال د طالبانو تر کنټرول لاندې باختر اژانس راپور ورکړی، چې په پروان ولایت کې د بارانونو د ورېدو له امله لسګونه کورونه ویجاړ شوي او یوشمېر څاوري هم تلف شوي دي.
په پروان کې د طالبانو د طبیعي پېښو پر وړاندې د مبارزې د چمتوالي ریاست مسوولینو ویلي، چې د دغه ولایت په شینوارو، جبل السراج ولسوالیو، مرکز او یوشمېر نورو سیمو کې د پرله پسې بارانونو له امله څه باندې ۷۰ کورونه ویجاړ او یوشمېر څاروي مړه شوي دي.
د دغه اژانس د یوه بل راپور له مخې، د فاریاب ولایت په یو شمېر ولسوالیو کې شاوخوا ۲ زره څاروي د واورې او یخنۍ له کبله مړه شوي دي.
له بل پلوه د طالبانو پېښو ته د رسېدنې په چارو کې د دولت وزارت وایي، چې د کب په نهمه او لسمه نېټه د ورښتونو په نوې څپه کې نهه کسان مړه شوي او دوه ټپیان دي.
د دغه وزارت ویاند په یوه ویډیویي پیغام کې ویلي، چې پېښو ته د رسېدنې چارو د رییسانو د راپورونو له مخې د واورې، بارانونو او سړې هوا له امله په کندهار، هرات، بادغیس، هلمند، سرپل، بدخشان، او جوزجان ولایتونو کې نهه کسان مړه شوي، دوه ټپیان دي او ځینې کورونه په کلي او جزوي توګه تخریب شوي دي.
خو ځینو رسنیو بیا په دغو پېښو کې د مړو شویو کسانو شمېر پنځلس تنه یاد کړی او ویلي یې دي، چې د دغې سړې څپې له امله له ۶۰۰۰ زیات څاروي په بادغیس، فاریاب، هرات، جوزجان او فراه ولایتونو کې له منځه تللي دي.