د تاجکستان او افغانستان د پولو د امنیت د ټینګښت مسوده ټولیز امنیت تړون ته وسپارل شوه
تاجکستان اعلان وکړ، چې له افغانستان سره د دغه هېواد د پولو د ټینګولو لپاره د یوه پلان مسوده بشپړه شوې او د ټولیز امنیت تړون سازمان ته یې سپارلې ده.
تاجکستان اعلان وکړ، چې له افغانستان سره د دغه هېواد د پولو د ټینګولو لپاره د یوه پلان مسوده بشپړه شوې او د ټولیز امنیت تړون سازمان ته یې سپارلې ده.
د ټولیز امنیت تړون سازمان د ۲۰۲۱ کال له اګسټ مياشتي راهیسې چې طالبانو د افغانستان واک تر لاسه کړ پولې ته څېرمه څو پوځي تمرینونه کړي دي.
د تاجکستان د بهرنیو چارو وزارت نن لیکلي، چې د ټولیز امنیت تړون د غړو هېوادونو د وزارتونو او څانګو د استازو غونډه د کب له ۸مې تر ۱۱مې په مسکو کې جوړه شوه.
د دغه راپور له مخې،«په دې غونډه کې غړو هېوادونو د دې سازمان د غړو پلانونه او پرېکړې نهايي کړې او د اسنادو يوه بسته يې د دې سازمان دايمي شورا ته د بيا کتنې لپاره وړاندې کړه، چې د نهايي تصويب په اړه يې پرېکړه وکړي.»
د تاجکستان د بهرنیو چارو وزیر سراج الدین مهرالدین سږکال د سلواغې په مياشت کې وویل، هېواد یې تمه لري، چې د پولو د پیاوړتیا پروګرام به په ۲۰۲۴ کال کې تصویب شي.
د ښاغلي مهرالدین په وینا، ټاکل شوې وه، چې دغه پروګرام په ۲۰۲۳ کال کې تصویب شوی وای؛ خو د تخنیکي دلایلو له امله تر ۲۰۲۴ کال پورې وځنډول شو.
ورته مهال د طالبانو تر کنټرول لاندې باختر اژانس راپور ورکړی، چې په پروان ولایت کې د بارانونو د ورېدو له امله لسګونه کورونه ویجاړ شوي او یوشمېر څاوري هم تلف شوي دي.
په پروان کې د طالبانو د طبیعي پېښو پر وړاندې د مبارزې د چمتوالي ریاست مسوولینو ویلي، چې د دغه ولایت په شینوارو، جبل السراج ولسوالیو، مرکز او یوشمېر نورو سیمو کې د پرله پسې بارانونو له امله څه باندې ۷۰ کورونه ویجاړ او یوشمېر څاروي مړه شوي دي.
د دغه اژانس د یوه بل راپور له مخې، د فاریاب ولایت په یو شمېر ولسوالیو کې شاوخوا ۲ زره څاروي د واورې او یخنۍ له کبله مړه شوي دي.
له بل پلوه د طالبانو پېښو ته د رسېدنې په چارو کې د دولت وزارت وایي، چې د کب په نهمه او لسمه نېټه د ورښتونو په نوې څپه کې نهه کسان مړه شوي او دوه ټپیان دي.
د دغه وزارت ویاند په یوه ویډیویي پیغام کې ویلي، چې پېښو ته د رسېدنې چارو د رییسانو د راپورونو له مخې د واورې، بارانونو او سړې هوا له امله په کندهار، هرات، بادغیس، هلمند، سرپل، بدخشان، او جوزجان ولایتونو کې نهه کسان مړه شوي، دوه ټپیان دي او ځینې کورونه په کلي او جزوي توګه تخریب شوي دي.
خو ځینو رسنیو بیا په دغو پېښو کې د مړو شویو کسانو شمېر پنځلس تنه یاد کړی او ویلي یې دي، چې د دغې سړې څپې له امله له ۶۰۰۰ زیات څاروي په بادغیس، فاریاب، هرات، جوزجان او فراه ولایتونو کې له منځه تللي دي.
