د ملګرو ملتونو امنیت شورا په غزه کې د خوراکي توکو د مرستو ترلاسه کولو پر مهال د څه باندې سلو فلسطینیانو پر وژل کېدو خواشیني څرګنده کړه. دغې شورا په یوې خبرپاڼه کې د ولسي وګړو د ژوند او ملکي بنسټونو د خوندیتوب لپاره پر لازمو ګامونو اخیستو ټینګار وکړ.
د امنیت شورا همداراز ټینګار کړی چې د جګړې ټولې خواوې باید د نړېوالو قوانینو له مخې خپلو ژمنو ته غاړه کېږدي.
دغې شورا له ښکېلو خواوو وغوښتل، چې ولسي وګړي له اساسي لومړنیو خدمتونو او بشري مرستو بې برخې نه کړي.
د حماس تر واک لاندې د روغتیا وزارت چارواکي وايي، په غزه کې د پنجشنبې په ورځ د اسراییلي ځواکونو په ډزو کې هغه ۱۱۵ کسان وژل شوي چې د خوراکي توکو مرستو ته په تمه ولاړ و.
د اسراییل پوځ بیا دغه ادعاوې ردوي او وایي، چې دغه خلک د مرستو ترلاسه کولو او د لاریو د د ګڼې ګوڼې او ګډوډۍ له امله تر پښو لاندې شوي او مړه شوي دي.
اخوا، رویټرز خبري اژانس هم د عیني شاهدانو په حواله لیکلي، چې اسراییلي عسکرو په هغو کسانو ډزې وکړې چې د خوراکي توکو د ترلاسه کولو په موخه په تمه ولاړ و.
