مقاومت جبهه: په کابل کې مو درېیو وسله والو طالبانو ته مرګ ژوبله اړولې ده
د افغانستان د ملي مقاومت په نوم د طالبانو مخالفې وسله والې ډلې ادعا کړې ده، چې نن سهار مهال یې د کابل ښار په ۱۵مه حوزه کې یو طالب وژلی او دوه نور ټپیان دي.
د افغانستان د ملي مقاومت په نوم د طالبانو مخالفې وسله والې ډلې ادعا کړې ده، چې نن سهار مهال یې د کابل ښار په ۱۵مه حوزه کې یو طالب وژلی او دوه نور ټپیان دي.
د افغانستان د ملي مقاومت په نوم دغې جبهې نن سې شنبه ( د کب ۲۲مه) پر خپلې اېکس پاڼې په یوه یادښت کې ویلي، چې د ملي مقاومت جبهې ځواکونو د کابل ښار د ۱۵مې امنیتي حوزې اړوند د طالبانو پر یوې پوستې برید کړی، چې په پایله کې یې دوه تنه ټپیان شوي او یو بل وژل شوی دی.
په یادښت کې ویل شوي، چې په دغه برید کې د دوی ځواکونو ته کوم زیان نه دی رسېدلی.
تر اوسه د دغې په اړه طالبانو رسنیو ته څه نه دي ویلي.
افغانستان انټرنشنل - پښتو د یوې بې پرې رسنۍ په توګه نه شي کولی، چې دا ډول پېښې په خپل سر تایید او یا رد کړي؛ خو وروستیو پېښو ته په کتو په افغانستان کې د طالبانو پر وړاندې د مخالفو جبهو بریدونه زیات شوي دي.
د افغانستان او ایرلنډ ترمنځ د درې ورځنیو کرېکټ سیالیو وروستۍ لوبه کې افغانستان دغه هېواد ته د ۲۳۷ منډو هدف وټاکه.
دغه لوبې نن سې شنبه د مازدیګر په ۴ بجو د متحده عربي اماراتو په شارجه لوبغالي کې پیل شوې دي.
د لوبې پچه چې ایرلنډ وګټله لومړی یې د توپ اچونې پرېکړه وکړه.
د افغانستان د کرېکټ لوبغاړو په پنځوسو اورونو کې خپل ټول لوبغاړي له لاسه ورکړل او ایرلنډ ته یې د ۲۳۷ منډو هدف وټاکه.
د افغانستان د کرکټ ملي لوبډله له ایرلنډ ملي لوبډلې سره د روانې پنځوس اوریزې لوبلړۍ درېیمه او وروستۍ لوبه کوي.
افغان لوبډلې د دې پړاو سیالیو په لومړۍ لوبه کې ایرلنډ ته د ۳۵ منډو په توپیر ماتې ورکړې وه؛ خو وړمه ورځ د دواړو لوبدلو ترمنځ دویمه یو ورځنۍ لوبه بیا د باران له امله ونه شوه.
د راپورونو له مخې، افغانستان او ایرلنډ تر اوسه په خپلو کې ۳۰ نړۍوالې یو ورځنۍ لوبې کړي، چې افغانستان په کې ۱۷ ګتلي، یوه لوبه بې پایلې پای ته رسېدلې او یوه لوبه لغوه شوې ده.
د ازبکستان د بهرنیو چارو وزیر بختیار سعیدوف له یو شمېر لوړپوړو طالب چارواکو سره په کتنه کې ویلي، چې هېواد یې هېڅکله افغانستان یوازې نه پرېږدي او د دواړو هېوادونو ترمنځ د اړیکو لا پراختیا غواړي.
بختیار سعیدوف نن په جلا جلا کتنو کې د طالبانو له رییس الوزرا ملا محمد حسن، د ریاست الوزرا له اقتصادي مرستیال ملا عبدالغني برادر، له اداري مرستیال عبدالسلام حنفي او د طالبانو د بهرنیو چارو له وزیر امیر خان متقي سره کتلي دي.
ښاغلي سعیدوف له ملا محمد حسن سره په کتنه کې ویلي، چې هېواد یې غواړي په افغانستان کې د سمنټو د تولید د یوې فابریکې د جوړولو، د ډبرو سکرو د استخراج او له ډبرو سکرو د ۲۰۰ میګاواټه برېښنا د تولید په برخو کې پانګونه وکړي.
نوموړي همداراز ویلي، چې د ټرانس-افغان پټلۍ پروژې د عملي چارو د پیل لپاره به هم په نږدې راتلونکي کې ارزونه وشي.
طالبانو د بختیار سعیدوف په حواله لیکلي: «ازبکستان ته له امو سیند څخه د افغانستان د استفادې دریځ ارزښت لري او د قوشتیپې کانال په تخنیکي برخه او همدا راز د اوبو لګونې د عصري سیسټمونو په عملي کولو کې له طالبانو سره همکارۍ ته ژمن دي.»
طالبانو بیا د ازبکستان د بهرنیو چارو له وزیر او مل پلاوي سره یې په کتنه کې ویلي، چې د دغې ډلې اداره اقتصاد محوره بهرنی سیاست تعقیبوي او تمرکز یې پر سیمهییز اتصال دی او دې موخې ته د رسېدو لپاره د سیمې او په ځانګړې توګه د ازبکستان همکارۍ ته اړتیا لري.
د ملا برادر دفتر د ازبکستان بهرنیو چارو وزیر له فوله ویلي چې ډېر ژر به په تاشکند کې د دوی سفیر ومني.
ازبکستان میاشت مخکې د طالبانو استازي ته دغه سفارت وسپاره.
د ویلو ده، چې ازبکستاني چارواکو بیا تر اوسه ددغو لیدنو په اړه څه نه دي ویلي.
د پخواني حکومت د ملي روغې جوړې د عالي شورا مشر عبدالله عبدالله د یوناما له سیاسي مرستیال سره په کتنه کې ووېل، چې افغانان په روژه کې لا ډېرو بشري مرستو ته اړتیا لري. ښاغلي عبدالله په خپل اېکس کې لیکلي، چې له مارکس پوتزل سره یې په کتنه کې د افغانستان او سیمې پر وضعیت پبرې درلودې.
که څه هم نوموړي په دې کتنه کې له افغانانو سره د ملګرو ملتونو له مرستو مننه کړې، خو ټینګار کوي چې دغه مرستې باید دوام وکړي.
ښاغلي عبدالله لیکلي: «په روان موسم او د روژې په مبارکه میاشت کې افغانان لا ډېرو بشري مرستو ته اړتیا لري.»»
له دې سره، د پخواني حکومت د ملي روغې جوړې د عالي شورا مشر بیا په جلا کتنه کې د ایران د ولسمشر له ځانګړي استازي حسن کاظمي قُمي سره هم کتلي دي.
دواړو لورو په افغانستان او سیمه کې د روان وضعیت په اړه خبرې کړي دي.
پر افغانستان د طالبانو له بیا واکمنېدو سره ډیری افغانان له جدي بشري ننګونو سره مخ شوې دي.
د ځينو نړیوالو سازمانونو د راپورونو له مخې، اوسمهال په افغانستان کې څه باندې ۲۸ میلیونه خلک بشري مرستو ته اړتیا لري.
سرچينو افغانستان انټرنشنل- پښتو ته وویل، په افغانستان کې د پاکستان سفیر نن په کندهار کې د طالبانو له والي او د دې ډلې مشر ملا هبت الله اخوندزاده ته له نږدې کس ملا شیرین سره په ليدنه کې له نوموړي غوښتې، چې پر ډيورنډ کرښه د پاسپورټ په جبري کولو کولو کې ورسره همکاري وکړي.
پاکستان له تېر اکتوبر راهیسې اول چمن- سپین بولدک او بیا د پکتیکا پر انګور اډه بې پاسپورټه تګ بند کړ، خو له هغه راهیسې د اسلام اباد ددې پرېکړې په مقابل کې پرلت روان دی.
د دواړو سیمو پرلتوال وخت ناوخت له طالبانو هم غواړي چې ملاتړ یې وکړي او د دې ډلې چارواکو هم په دې وروستیو کې بیا بیا ویلي چې ډیورنډ کرښه له پاکستان سره د رسمي پولې په توګه نه مني.
که څه هم د طالبانو د والي ملا شیرن او عبیدالرحمان نظاماني اړوند خبرپاڼه کې د پاسپورټ جبري کولو مسلې ته اشاره نه ده شوې، خو سرچینې وايي، چې اسلام اباد په دې برخه کې د طالبانو همکاري غواړي.
دغه سرچینې زیاتوي: «سفير له حاجي ملاصاحب (والي) وغوښتل، چي پر ډيورنډ کرښه د پاسپورټ په جبري کېدو کې ورسره همکاري وکړي، عام خلک او سوداګرو ته په دې برخه کې قناعت وکړي.»
کندهار ته د عبیدالرحمان نظاماني سفر په پاکستان کې د نوي حکومت تر جوړېدو لږ وروسته دی.
د طالبانو د اعلامیې له مخې، نظاماني له طالبانو سره د پاکستان د نوي حکومت د ښو اړیکو پيغام هم طالب مشرتابه ته وړاندي کړی.
ملا شیرین د طالبانو او پاکستان د اړیکو رغولو لپاره د تېرې جنورۍ په لومړیو کې اسلام اباد ته هم سفر درلود او د دغه هېواد له سرپرست لومړي وزیر، بهرنیو چارو وزیر او نورو چارواکو سره یې ولیدل.
ملا شيرين له ښاغلي نظاماني سره نننۍ لیدنه کې هم د پاکستان له نوي حکومت غوښتنه کړې، چې له دوی سره نژدې اړیکې وساتي او د دواړوهېوادونو د پاليسو او غوښتنو په لاره ولاړ شي.
طالبان وايي، عبیدالرحمان نظاماني هم ملاشيرين ته ويلي، چې ډېر ژر به د پاکستان د نوي حکومت له چارواکو سره د ليدنې زمينه ورته برابره او دغه هېواد ته د سفر بلنه به ور کول شي.
کندهار ته د نظاماني دا سفر داسي مهال دی، چې له تېرو درېيو ورځو د ډيورنډ کرښې په بېلابېلو سیمو کې د طالبانو او پاکستاني سرحديانو ترمنځ جګړې شوې دي.
د سرچينو د معلوماتو له مخي، نظاماني د دواړو هېوادو د يوې بامسوليته کمېټې د جوړېدو غوښتنه هم کړې، چې پر ډيورنډ کرښه د ناامني او د جګړې پېښې ژر کابو او د خبرو له لارې حل کړي.
د امریکا استخباراتي ادارو په یوه راپور کې لیکلي، چې د «طالبانو د رژیم» پر وړاندې د مقاومت د ګواښ احتمال کمزوری دی ځکه چې «ډیری افغانان له جګړې او د طالبانو له انتقام څخه ستړي شوي دي.» په راپور کې دا هم راغلي، چې د طالبانو مخالف وسله وال «قوي مشرتابه» او بهرنی ملاتړ نه لري.
د امریکا د ملي امنیت پر وړاندې د ګواښونو د ارزونې په کلني راپور کې، چې د دوشنبې په ورځ خپور شو ویل شوي، چې د طالبانو حکومت په افغانستان کې خپل واک پیاوړی کړی او د دې ډلې مخالف ځواکونه یې ځپلي دي.
وروسته له هغه چې طالبان د ۱۴۰۰کال په زمري مياشت یا د ۲۰۲۱ کال په اګسټ کې په افغانستان واک ته ورسېدل، لږ تر لږه دوو طالب ضد پوځي جبهو د افغانستان په شمالي سېمو کې د دې ډلې پر ضد فعاليتونه پيل کړل.
د ازادۍ او د ملي مقاومت د جبهو په ګډون د طالبانو ضد جبهې کله ناکله د طالبانو پر ځواکونو د چریکي بریدونو راپور ورکوي.
په ځینو مواردو کې، طالبانو د دغو ځواکونو غړي او قومندانان، چې دوی یې « یاغیان» بولي وژلي دي.
د امریکا د استخباراتي ادارو په کلني راپور کې ویل شوي، چې د طالبانو حکومت د خپلو مخالفو ځواکونو د ځپلو ترڅنګ له نړیوالې ټولنې سره د اړیکو د قوي کولو توان هم لري.
په راپور کې راغلي، چې له دې سره سره به طالبان د افغانستان روان بشري ناورین او اقتصادي کمزورتیا ته رسېدنه ونه کړي.
امریکايي استخباراتي ادارو دا هم لیکلي، چې طالبانو د محدودو تګلارو پلي کولو ته دوام ورکړی، چې پکې د نجونو پر زدکړو بندیز، په عام محضر کې تورنو ته سزا ورکول، د لاریونونو او اعتراضاتو ځپل شامل دي.
د طالبانو تر واک لاندې د افغانستان په اړه د سیمې د هېوادونو تګلاره
د امریکا د استخباراتي ادارو په راپور کې راغلي، چې د سیمه ییزو قدرتونو تمرکز دا دی چې د افغانستان ستونزه په دغه هېواد کې محدوده وساتل شي او په ورته وخت کې له طالبانو سره د دوه اړخیزو اړیکو د پراخولو هڅه کوي.
خو په راپور کې ټینګار شوی، چې د سیمې هېوادونه به د طالبانو د رسمیت پېژندګلوۍ د غوښتنې په اړه له احتیاطه کار واخلي.
د امریکا د څارګرې ادارې د راپور په یوه برخه کې دا هم ویل شوي، چې د داعش خراسان څانګه په افغانستان کې د نورو هېوادونو د ګټو په نښه کولو سره غواړي، چې د «طالبانو د رژیم» مشروعیت کمزوری کړي.
په افغانستان کې پر بهرنیو اهدافو د داعش د برید ګواښ
امریکايي استخباراتي ادارو ویلي دي، چې د داعش خراسان څانګه هڅه کوي په افغانستان کې پر بهرنیو اهدافو بریدونه وکړي.
د دې سازمان په کلني راپور کې راغلي، چې داعش هڅه کوي په افغانستان کې پر بهرنیو اهدافو په بریدونو سره د طالبانو د حکومت مشروعیت کمزوری کړي.
د طالبانو د دوه نیم کلنې واکمنۍ په موده کې داعش په افغانستان کې د ګڼو بریدونو پړه پر غاړه اخیستې ده.
که څه هم طالبان په افغانستان کې د داعش د ځپلو ادعا کوي؛ خو تل یې د دې ډلې پر پټنځیو د بریدونو خبر ورکړی دی.
داعش تېر کال په کابل کې د روسیې پر سفارت د برید مسوولیت منلی و. په دغه برید کې د دغه سفارت دوه کارکوونکي ووژل شول.
داعش هم په النبا مجله کې د روسیې پر سفارت د برید جزیات خپاره کړي، په کابل کې یې بهرني سفارتونه د «جاسوسۍ ځالې» بللې او په راتلونکي کې یې د بریدونو ګواښ کړی دی.
تېر کال په ليندۍ میاشت کې د داعش خراسان څانګې اعلان وکړ، چې په کابل کې یې د پاکستان پر سفارت برید کړی دی.
د دغه برید هدف د پاکستان د سفارت شارژدافیر عبیدالرحمان نظاماني وو او په برید کې د هغه یو ساتونکی ټپي شوی و.
داعش همدا ډول د هزاره ګانو او شیعه ګانو پر ضد د بریدونو مسوولیت منلی دی.
تېره میاشت د ملګرو ملتونو امنیت شورا هم په یوه راپور کې لیکلي وو، چې د طالبانو له خوا د داعش د ماتولو له ادعا سره سره دغې ډلې په افغانستان کې خپلو بریدونو ته دوام ورکړی او لا هم د سیمې لپاره ګواښ دی.