د اېرلنډ پر وړاندې د افغانستان د کرېکټ ملي لوبډلې د درېیو شل اوریزو لوبو لړۍ نن شپه د کابل په وخت ۸:۳۰ بجې په شارجه کرېکټ نړۍوال لوبغالي کې پیلیږي. د افغانستان کرېکټ بورډ د اېرلنډ پر وړاندې د دغو درېیو شل اوریزو لوبو لپاره وړمه ورځ د لوبغاړو ۱۵ کسیز نوملړ اعلان کړ.
په دغه اعلان شوي نوملړ کې د راشدخان او مجیب الرحمان ځدراڼ نومونه هم شامل دي.
راشدخان د ملا عملیات وروسته له تېرو درېیو میاستو راهیسې په استراحت کې و او مجیب الرحمان ځدراڼ د سریلانکا پر وړاندې د لوبو تمرین پرمهال ټپي شوی و او له هغه وخته یې په لوبو کې برخه نه وه اخیستې.
په دغو لوبو کې د افغانستان د ملي لوبډلې لوبډلمشري هم د راشدخان پر غاړه ده.
په دغه ۱۵کسیز نوملړ کې د راشدخان او مجیب الرحمان ترڅنګ د ابراهیم ځدراڼ، رحمان الله ګربز، صدیق اتل، اعجاز احمدزي، اسحاق رحیمي، محمدنبي، ننګیال خروټي، عظمت الله عمرزي، نوراحمد لکڼوال، وفادار مومند، فرید ملک، نوین الحق او د فضل الحق فاروقي نومونه هم شامل دي.
د دغه نوملړ یوه ځانګړنه دا ده، چې یوشمېر نوي او ځوان لوبغاړي هم په کې شامل شوي دي.
افغانستان تر دې وړاندې له اېرلنډ څخه د دوو لوبو په ګټلو او د باران له کبله د یوې لوبې له لغوه کېدو وروسته د یو ورځنیو لوبو سریز وګاټه؛ خو له هغه وړاندې اېرلنډ بیا له افغانستانه یوازینۍ ټېسټ لوبه د شپږو وېکټو په توپیر ګټلې وه.
