د سرچینو په وینا، په وژل شویو پوځیانو کې ۲یې جګپوړي افسران او ۵ یې سرتېري دي. برید نن سهار هغه مهال وشو، چې له چاودېدونکو توکو ډک موټر د شمالي وزیرستان د میرعلي په سیمه کې د خدۍ ودانۍ په دروازه کې وچاودېد او وروسته یوه ډله بریدګر دغه مرکز ته ور دننه شول او لاس په لاس جګړه ونښته.
د پوځ لهخوا په یوې خپره شوې خبرپاڼه کې راغلي، چې ځانمرګي بریدګر ټول شپږ کسه وو او د دوی د ځواکونو سره په مخامخ جګړه کې ټول ووژل شول.
ځینو سرچینو بیا ویلي، چې دغه برید د حافظ ګل بهادر ډلې کړی او په دغه برید کې د دغې ډلې فدایانو برخه لرله.
دغه سرچینې دا هم وايي، چې د دواړو خواوو تر منځ جګړه د څو ساعتونو لپاره روانه وه او ادعا کوي چې دواړو غاړو ته درنه مرګ ژوبله هم اوښتې ده.
د خیبر پښتونخوا په بېلابېلو سیمو په تېره بیا په وزیرستانونو کې د حکومتي ځواکونو او وسلهوالو ډلو تر منځ دغه شان پېښې تل کېږي؛ خو په اړه یې کره مالومات تر رسنیو ډېر وروسته رسېږي.
دا هغه سیمې دي چې له لسیزو وړاندې په کې د بېلابېلو هېوادونو جنګیالي اوسېدلي، روزل شوي او همدغلته یې پټن ځایونه هم وو.
