په ملګرو ملتونو کې د افغانستان د دایمي استازولۍ سرپرست نصیر احمد فایق د افغانستان پر خاوره د پاکستان د هوایي بریدونو په غبرګون وایي، چې د افغان ښځو او ماشومانو وژل د منلو وړ نه دي.
نوموړي د دوشنبې په ورځ (د کب ۲۸مه) په خپل اېکس کې لیکلي، چې هېڅ ډول امنیتي ګواښونه د ښځو او ماشومانو وژل توجیه کولی نه شي.
ښاغلي فایق زیاته کړې ده، چې په پکتیکا او خوست ولایتونو کې د پاکستاني پوځ هوایي بریدونه په ښکاره توګه د نړۍوالو قوانینو نقض دی.
پاکستاني پوځیانو د دوشنبې د ورځې په سهار د پکتیکا او خوست ولایتونو په شاوخوا سیمو کې د ترهګرو د پټنځایونو د په نښه کولو په نوم هوایي بریدونه وکړل.
په دغو بریدونو کې د درېیو ماشومانو په ګډون اته ښځې وژل شوې دي.
طالبانو پاکستان ته خبرداری ورکړی، چې که دا ډول بریدونه دوام وکړي، پاکستان ته به بدې پایلې ولري.
همدا راز؛ د افغانستان پر خاوره د پاکستان د برید وروسته د پاکستان د بهرنیو چارو وزارت وايي، چې د افغانستان یو شمېر واکمنان په فعاله توګه له ټي ټي پي څخه ملاتړ کوي او دغه ډله د یوې نیابتي ډلې په توګه د پاکستان پر ضد کاروي.
