اروپایي اتحادیه د افغانستان له درېیو زیانمنو ولایتونو سره پنځه میلیونه یورو مرسته کوي
اروپایي اتحادیه وایي، چې په غور، دایکنډي او بدخشان ولایتونو کې له زیانمنو کسانو سره به د پنځه میلیونه یورو مرسته وکړي.
اروپایي اتحادیه وایي، چې په غور، دایکنډي او بدخشان ولایتونو کې له زیانمنو کسانو سره به د پنځه میلیونه یورو مرسته وکړي.
یاده اتحادیه زیاتوي، دغه مرستې د زیانمنو ټولنو د ملاتړ لپاره د لوږې پر وړاندې د اقدام د سازمان په همکارۍ سره د څه باندې ۲۶ زره کسانو لپاره کیږي.
اروپایي اتحادیې د سې شنبه په ورځ (د کب ۲۹مه) وویل، چې دا مرستې تر راتلونکو درېیو کلونو د زیانمنو کسانو لپاره پام کې نیول شوي دي.
د دغه سازمان په اعلاميه کې راغلي، چې د دې پروژې پلي کېدل به هغو کسانو ته چې د خوارځواکۍ، د خوراکي توکو له کموالي او د کرنې لپاره د منابعو له نشتوالي سره لاس او ګرېوان دي، يو څه توپير رامنځته کړي.
دا پروژه د کرنیزو تولیداتو، د غواګانو نسل پالنه او د کوچنیو او منځنیو سوداګرۍ د پیاوړتیا لپاره متمرکزه ده.
په اعلامیه کې راغلي، چې په دې پروژه کې د کرنیزو مهارتونو د روزنې په برخه کې ښځې او ځوانان شامل دي.
د اروپايي اتحادیې کمېشنر رافلا ایوډیس د دې پروژې په هرکلي سره زیاته کړه: "د کرنې په میتودونو کې د مهارتونو او روزنې زیاتوالی به له افغان نارینه او ښځو سره مرسته وکړي، چې د اقلیم اړوند ګواښونو، د دوامداره عاید او د بې وزلۍ کچې د راټېټېدو په برخه کې چمتوالی ولري."
د لوږې پر وړاندې د اقدام سازمان یو چارواکي ویلي، چې په دایکنډي او بدخشان ولایتونو کې ۴۰ سلنه او په غور ولایت کې ۴۵ سلنه وګړي د خوراکي توکو له نه خوندیتوب سره مخ دي.
د دې سازمان مدیر ویجی رغوان ویلي؛ ۹۵ سلنه افغانان په کافي اندازه خوراکي توکي نه لري.
پر افغانستان د طالبانو له واکمنۍ وروسته او د بهرنیو مرستو د کمېدو ترڅنګ پر ښځو د دې ډلې له بندیزونو سره په دغه هېواد کې بېکاري او بې وزلي زیاته شوې ده.
ملګرو ملتونو په ۲۰۲۴ کال کې په افغانستان کې د اقتصادي او بشري ناورین سره د مقابلې لپاره د څه باندې درې میلیارده ډالرو غوښتنه کړې وه؛ خو تر اوسه یې د اړتیا وړ بودیجې له ۳ سلنې څخه کمه مرسته ترلاسه کړې ده.
