پاکستاني چارواکي وایي د دې هېواد په بلوچستان کې د ډبرو د سکرو په یوه کان کې د چاودنې له امله ۱۲ کسان ووژل شول. ددغو چارواکو په خبره، اته نور کسان بیا له دې پيښې ژغورل شوي دي.
پاکستاني چارواکو د چاودنې په تړاو پلټنې پیل کړي دي.
دا پېښه د سې شنبه په ماښام د بلوچستان په هرنایي سیمه کې د سکرو په یوه کان کې شوې ده.
د بلوچستان د کانونو د څېړنو مشر عبدالغني بلوڅ نن د ژغورنې عملیاتو د بشپړېدو خبر ورکړ.
د راپورونو له مخې، د کانونو کارګرانو تر دې مخکې د خوندیتوب د تجهیزاتو د کموالي او د ناسمو کاري شرایطو په اړه د دغه هېواد د کارګرانو اتحادیې ته شکایت کړی و.
پاکستانۍ رسنۍ وایي، چې د دغه هېواد د سکرو په کانونو کې د ناسمو کاري شرایطو له امله هر کال لسګونه کسان وژل کیږي.
