بلوڅ ازادي غوښتونکي ډلې د یوې خبرپاڼې په خپرولو سره د ګوادر بندر پر حکومتي اداره یا جي پي اې باندې د پرونيو بریدونو وروستي معلومات خپاره کړي او ویلي یې دي چې په دغو بریدونو کې یې د پاکستان د بېلابېلو ادارو ټول ۲۶ کسان وژلي او د دوی اته جنګیالي هم وژل شوي.
دغې ډلې د یوې خبرپاڼې په خپرولو سره ادعا کړې چې د پاکستان استخباراتو او پوځ ته یې د سر او مال درانه زیانونه اړولي دي.
د پاکستان حکومت تېره ورځ له برید لږ شیبه وروسته ويلي و چې دغه برید یې شنډ کړی او چاته په کې زیان نه دی اوښتی.
بلوڅ بیلتون پالې ډلې ویلي، چې دغه برید یې د یوې مهمې ناستې ترسره کېدو پر مهال کړی او ټول هغه کسان په کې په نښه شوي چې د بلوڅو ځوانانو، مېرمنو او ماشومانو په جبري لا درکه کېدو، وژنو او ځورونو کې یې لاس درلود.
په هغه خبرپاڼه کې چې بلوڅ بیلتون پالو خپره کړې راغلي: «د پوځې استخباراتو د دوو جګپوړو افسرانو په ګډون شپږ تنه افسران، د ای ایس ای اته غړي او د سمندري ځواکونو ۱۲ غړي په دغه برید کې وژل شوي. او په دغه برید زموږ اته تنه ټول برخه اخیستونکي هم وژل شوي.»
د بلوچستان د اطلاعاتو مخکني وزیر جان اڅکزی د دغه ایالت په ګوادر بندر کې پر حکومتي ادارو د برید پړه د هند پر استخباراتي اداره "را" واچوله.
جان اڅکزی په خپله اېکس پاڼه لیکلي؛ امنیتي ځواکونو په ګوادر کې د "را" اړوند د بلوڅ ازاديپال پوځ برید شنډ کړی.
نوموړی د پولیسو له قوله وايي، چې د ګوادر حکومتي ادارو سره نږدې په دغه برید کې ټول ښکېل اته وسلوال یې وژلي دي.
د ګوادر بندر حکومتي اداره یا جي پي اې کې د ټاکنو کمېسیون او پاسپورټ ریاست په ګډون بېلابېلې ادارې فعالې دي.
بلوڅ ازادي غوښتونکې ډلې د خبرپاڼې په خپرولو سره وايي، چې دې سیمه کې یې د ای اېس ای ودانۍ په نښه کړې دي.
بلوڅ بېلتون پالو د تېرې جنورۍ پر وروستۍ نېټه د بلوچستان په مچ کې هم د پاکستان پر امنیتي ادارو ډله ییز برید کړی و، چې نږدې درې ورځې روان و.
د بلوځ بیلتون پالو په ګډون څو وسلوالې ډلې په بلوچستان کې د پاکستان پر ضد له کلونو راهیسې نښتې کوي.
دوی د ګوادر بندر پر پراختیا پروژه چې پاکستان یې د چین په همکارۍ پرمخ بیايي په تېرو کلونو کې ورته بریدونه کړي دی.
دا ډلې اسلام اباد د بلوچستان د ځايي خلکو د سرچینو پر لوټلو تورنوي او پر پاکستان سربېره چین ته هم خبرداری ورکوي چې له دې پروژې تېر شي.
