ټاکل شوې، چې نن جمعه د هندوستان د غوره لیګ (ای، پي، اېل) سیالیو ۱۷م پړاو پیل شي. د دغو سیالیو د پیل لومړنۍ لوبه به د اتلې چېنای سوپرګېنګز او رویل چلېنجرز بنګلور لوبډلو ترمنځ وي، چې د چېنای په ښار کې ترسره کېږي.
په سږني پړاو کې ۸ افغان لوبغاړي هم بېلابېلو لوبډلو سره یو ځای شوي دي.
راشدخان، نور احمد لکڼوال او عظمت الله عمرزی د ګوجرات ټایټانز، مجیب الرحمن او رحمن الله ګربز د کلکتې نایټ رایډرز، فضل حق فاروقي د سن رایزر حیدراباد، محمدنبي د ممبي اېنډینز او نوین الحق بیا د لکنهو سوپر جاینټز په لوبډله کې لوبېږي.
د هند د کرېکټ غوره لیګ (ای، پي، اېل) چې نړۍ د کرېکټ په لیګونو کې تر ټولو ستر لیګ ګڼل کېږي، دا ځل به لس ګډونوالې لوبډلې سره ۷۴ سیالۍ ترسره کړي.
