د پاکستان پخواني لومړي وزیر او د تحریک انصاف ګوند بنسټ اېښودونکي عمران خان وړاندوینه کړې، چې اوسنی حکومت به له څلورو تر پنځو میاشتو زیات دوام ونه کړي. هغه په دې باور دی، چې د حکومت سقوط به له اډیاله زندانه د هغه د خلاصون لاره هم هواره کړي.
عمران خان له خبریالانو سره د خبرو پرمهال ویلي، له همدې امله پيپلز ګوند په کابينه کې نه دی شامل شوی.
ښاغلي خان وویل، چې د هغه په وړاندې قضیه بې بنسټه ده او ادعا یې وکړه، چې خزانې ته هیڅ زیان نه دی رسېدلی ځکه چې له انګلستان څخه لېږدول شوې پېسې د حکومت په واک کې وې او د جرم هیڅ نښې نښانې په کې نه لیدل کېږي.
ښاغلي خان ویلي، چې اوسنيو حالاتو ټول نظام افشا کړى او زياته یې کړه، چې په هر څه کې لاس وهنه روانه ده.
ښاغلي خان په خواشینۍ سره وویل، چې د ایران او افغانستان سره د پاکستان اړیکې خړې پړې شوې دي او اندېښنه یې څرګنده کړه، چې دا به په هېواد کې د ترهګرۍ د زیاتوالي لامل شي.
