د ملګرو ملتونو د بشري مرستو د همغږی دفتر (اوچا) وایي، چې د افغانستان په اوو ولایتونو کې د وروستیو اورښتونو له امله ۷ کسانو ژوند له لاسه ورکړی او سلګونه کورونه زیانمن شوي دي. د اورښتونو او سیلابونو له امله د یو شمېر لارو تړل کېدو د ژغورونکو ډلو کار هم ستونزمن کړی دی.
اوچا د یوې خبرپاڼې په خپرولو سره ویلي، چې د هېواد په شمال کې فاریاب، په ختیځ کې ننګرهار او دایکندي ولایت د هېواد په مرکزي ولایتونو کې تر ټولو اغېزمنې سیمې بلل شوي دي.
د راپور له مخې، په دغو اورښتونو کې ۳۸۴ کورنۍ په شدیده توګه زیانمن شوي دي.
دغې ادارې له طالبانو سره په همغږۍ او د خپلو بشردوستانه شریکانو په همکارۍ سره له زیانمنو کورنیو سره د مرستو د ژمنو ترڅنګ زیاته کړې ده، چې په ځینو سیمو کې د پلونو د ویجاړېدو له امله زیانمنو سیمو ته لاسرسی نه لري.
اوچا په خپره شوې خبرپاڼه کې ویلي، چې یوازې د تېرو دوو ورځو په اورښتونو کې څه باندې یو نیم زر جریبه کرنیزې ځمکې تخریب شوې دي.
د یادولو ده، چې په هېواد کې وروستی ژمی د افغانانو لپاره سخت او خونړی ژمی و، چې له امله یې لسګونو کسانو ژوند له لاسه ورکړ، زرګونه څاروي له منځه ولاړل او سلګونو کورنیو ته سخت مالي تاوانونه واوښتل.
