په رفح او خان یونس کې د اسراییل لهخوا د شپې ناوخته هوايي ډزو کې د ماشومانو په ګډون ګڼ فلسطینیان وژل شوي دي. یوازې د غزې په رفح ښار کې د اسراییل لهخوا د شپې ناوخته د هوايي ډزو او په کورونو د بمبارۍ له امله لږ تر لږه ۸ کسان وژل شوي دي.
د راپورونو له مخې، په تېرو ۲۴ ساعتونو کې په غزه کې تر ۵۰ زیات فلسطینیان وژل شوي دي.
د فلسطیني رسنیو د خبر له مخې، اسراییلي پوځیانو تېره شپه د غزې په دیرالبله سیمه کې هوايي ډزې او توغندیز بریدونه ترسره کړل، چې په پایله کې یې د درېیو ماشومانو په ګډون ۸ فلسطینیان ووژل شول.
له بل پلوه په خان یونس کې اسراییلي ځواکونو په هوايي بریدونو کې یو شمېر کورونه په نښه کړل، چې له امله يې لږ تر لږه ۵ فلسطینیان ووژل شول او ۱۰ نور ټپیان شول.
ورته مهال د اسراییل توپخانې د شیخ عجلین، طلحه او الزیتون په ګډون د غزې بېلابېلې سیمې په نښه کړې، چې له امله یې د ښځو او ماشومانو په ګډون ګڼ شمېر کسان ژوبل شوي دي.
د اکټوبر له اوومې راهیسې پر غزې د اسراییل په بریدونو کې لږ تر لږه ۳۲ زره ۹۷۵ فلسطینیان وژل شوي او ۷۵ زره او ۵۷۷ نور ټپیان دي.
