د افغانستان د فوټسال ملي لوبډله نن د تاجکستان پر وړاندې لوبېږي
د افغانستان فوټسال ملي لوبډله د اسیا جام سیالیو ته د چمتوالي په موخه نن د تاجکستان پر وړاندې لوبېږي. دغه لوبه نن د ټایلنډ په کوربهتوب د افغانستان په وخت د مازیګر ۴:۳۰ بجې پیلېږي.
د افغانستان فوټسال ملي لوبډله د اسیا جام سیالیو ته د چمتوالي په موخه نن د تاجکستان پر وړاندې لوبېږي. دغه لوبه نن د ټایلنډ په کوربهتوب د افغانستان په وخت د مازیګر ۴:۳۰ بجې پیلېږي.
اسیا جام فوټسال سیالۍ د روانې اپرېل میاشتې پر ۱۷مه نېټه د ۱۶ لوبډلو ترمنځ په ټایلینډ کې پیلیږي او د همدې میاشتې تر ۲۸مې نېټې به دوام وکړي.
د اسیا جام فوټسال په سیالیو کې افغان لوبډله په ډي ګروپ کې له ایران، کویټ او بحرین لوبډلو سره لوبې لري.تر دې وړاندې افغان لوبډلې په خپلو دوو دوستانه سیالیو کې ټایلنډ لوبډلې ته د ۷-۳ او ۵-۳ په توپیر ماتې ورکړې وه.
دغه لوبه په تایلینډ کې ترسره شوې او پر ټلویزیون نه ده خپره شوې.
د افغانستان له لوبډلې اکبر کاظمي، میثم فیضي، حسین محمدي او مهران غلامي هغه لوبغاړي و، چې په دې سیالۍ کې یې ګولونه ووهل او د اسیا د فوټسال دریم مقام لرونکي ټیم ټایلنډ ته یې ماتې ورکړه.
له دې لوبې وروسته به د افغانستان د فوټسال ملي لوبډله د روان کال د وري په ۲۱مه له سعودي عربستان سره، وري په ۲۳مه له تاجکستان سره د وري په ۲۵مه له چین سره تمریناتي لوبې وکړي.
د افغانستان د فوټسال ملي لوبډلې ټولې درې لوبې په ټایلنډ کې ترسره کیږي.
له دې درېیو لوبو وروسته به افغان لوبډله اسیایي جام ته لاره پیدا کړي.
د افغانستان د فوټسال ملي لوبډله چې دیارلسه ورځې وړاندې د تمریناتي لوبو د ترسره کولو په موخه ټایلنډ ته رسېدلې، تر اوسه یې له تایلنډ او میانمار سره شپږ لوبې کړي چې درې یې ګټلي، دوه یې بایللي او یوه یې مساوي کړې ده.
