د افغانستان فوټبال فدراسيون د اسيا ملتونو جام سياليو لپاره د فوټسال ۱۴ کسيزه ملي لوبډله اعلان او د لوبغاړو نوملړ يې خپور کړ. د فوټسال د ۲۰۲۴ کال اسیايي سیالۍ تایلینډ کې سبا یا د اپریل میاشتې په ۱۷مه پيلېږي او د همدې میاشتې تر ۲۸مې نیټې به دوام وکړي.
د فوټسال اسیا ملتونو جام په سيالیو کې افغانستان په ډي ګروپ کې له ایران، کوېټ او بحرين سره لوبي کوي او خپله لومړۍ سیالي یې د اپريل په ۱۸مه نېټه له ایران سره ده.
د افغانستان فوټبال فدراسیون نن پر خپله فېسبوک پاڼه د مجيد مرتضا ابرودي په روزنه د فوټسال ملي لوبډلې ۱۴ لوبغاړي اعلان کړه.
فدراسيون په دې لوبغاړو کې محمدجواد صفري، علي رضا جعفري، علي احمد محسني، مهدي نوروزی، علي جعفري، میثم فیضي، رضا محسن پور، مهران غلامي، امید قنبري، اکبر کاظمي، محمد مرادي، فرزاد محمودي، حسین محمدي او صیاد مجتبا غوره کړي دي.
