د ایران د رېلي پراختیایي کنسرسیوم مرستیال طاهر افشار وایي، چې له ایران څخه ترکیې ته د افغانستان د تلونکي ټرانزیټي اورګاډي ستونزه هواره شوې ده او ډېر ژر به دغه ټرانزیټي اورګاډی له دغه هېواد څخه تېر شي.
نوموړي د دغې کڅوړې د لېږد لپاره د جواز د نه شتون خبره رد کړه او زیاته یې کړه، چې د ایران د کورنیو چارو وزارت او د خراسان رضوي والي د وري په ۲۰مه نېټه له ایران څخه د یاد ټرانزیټي اورګاډي د تېرېدو په اړه د دغه هېواد د اور پټلۍ ادارې ته خبر ورکړی و.
یاد ټرانزیټي اورګاډي د تېرې اونۍ په وروستیو کې د ترکیې په موخه له هرات څخه حرکت کړی و.
تر دې مخکې داسې خبرونه خپاره شوي وو، چې ایران د افغانستان لومړۍ ټرانزیتي رېل ګاډی درولی دی؛ خو د ایران د رېل پټلۍ ادارې د یوې اعلامیې په خپرولو سره دغه خبر رد کړ.
ایران د لاجورد کرېډور سره د سیالۍ په موخه چې د هرات له لویدیځو سیمو څخه پیل او د ترکمنستان د ترکمن باشي تر بندر پورې دوام کوي، دوه کاله مخکې د رېلي پراختیا کنسرسیوم جوړ کړ.
د کنسرسیوم د لېږد رالېږد د مرستیال په خبره، د خواف - هرات - ترکیې د اورګاډي کرښې ګټې اخیستنې له پیل څخه تراوسه پورې په تېرو شپږو میاشتو کې له ۲۰ واګونونو سره ۱۶ درانه اورګاډي تېر شوي دي.
