د روغتیا نړۍوال سازمان د جمعې په ورځ د غويي په اتمه له هېوادونو غوښتنه وکړه، چې له حیواناتو څخه دې انسانانو ته د والګي په لېږد کې ډېر هوښیار واوسي. دغه سازمان وايي، چې دغه ویروس په شېدو کې پېژندل شوی او خلک دې د اومو شېدو له کارولو ډډه وکړي.
د ملګرو ملتونو د روغتیا سازمان وویل، خلکو ته په کار ده چې پر دغې ناروغۍ د مخنیوي لپاره دې له الوتونکو مرغانو او هغه تي لرونکي حیواناتو څخه چې د والګي په ویروس او یا د حیواني والګي پر نور ویروسونو ککړ وي ډډه وکړي.
دغه سازمان دا رنګه وویل: «بیا، بیا توصیه کوو چې خلک دې هغه شېدې وکاروي، چې په هغو کې باکتریاوې او ویروسونه له منځه تللي وي او د اومو شېدو څخه دې په کلکه ډډه وکړي.»
دغه سازمان زیاته کړه: «دغه ویروس په شېدو کې پېژندل شوی او د هغو د لېږد احتمالي امکانات تر ارزونې لاندې دي.»
د امریکا د خوړو او درملو ادارې د پنجشنبې په ورځ ناوخته وویل، چې د هرو پنځه ډوله سوداګریزو شېدو په ارزونه کې دا مالومه شوه چې د دغې ناروغۍ خورېدل له هغه څخه زیات چټک دي چې پخوا یې په اړه اټکل کېده.
امریکایي چارواکو د غواګانو په شېدو کې د دغه یاد شوي ویروس د کابو کولو لپاره لازم ګامونه اخیستي، چې دا مهال یې په ۸ ایالتونو کې ۳۳ رمې تر کنټرول لاندې راوستې دي.
