د افغانستان د فوټسال ملي لوبډلې چې په لومړي ځل نړۍوال جام ته لاره ومونده، پخوانیو چارواکو او طالبانو د مبارکۍ ترڅنګ دا ستره بریا وستایله. پخواني ولسمشر محمد اشرف غني په خپل اېکس کې ټولو افغانانو ته د مبارکۍ ترڅنګ لیکلي، چې افغانان د سل ځلې لوېدو سربېره بیا هم پورته کیږي.
نوموړی وایي: «دا بری د یوه لرغوني ولس په توګه زموږ د ټینګار، دوام او ځاني ویسا تر ټولو ښکاره نښه ده، چې که «سل ځله پر مخ لوېږي پورته کېږي!» او د تیارو له منځه د رڼا څرک ته وځي.»
له دې سره، د طالبانو ویاند ذبیح الله مجاهد هم په خپل اېکس کې د فوټسال ملي لوبډلې بریا ته خوښي څرګنده کړې.
نوموړي لیکلي: «ټولو هېوادوالو ته د فوټسال ملي لوبډلې ستره بریا او ۲۰۲۴ نړۍوال جام ته یې د لار موندنې مبارکي وایم.»
افغان فوټسال ملي لوبډلې د اسیا د ملتونو جام سیالیو په وروستۍ پلې اف کې قرغیزستان ته د ۵ - ۳ ګولونو په توپیر ماتې ورکړه او نړۍوال جام ته یې لار وموندله.
دا لوبه نن د تایلنډ په بنکاک کې ترسره شوه.
د افغانستان د فوټسال ملي لوبډلې په دې تاریخي لوبه کې امید قنبري، اکبر کاظمي، مهدي نوروزي د افغانستان لپاره یو یو ګول او مهران غلامي دوه ګولونه ووهل.
د ملي روغې جوړې عالي شورا پخواني مشر ډاکټر عبدالله عبدالله هم د افغانستان د فوټسال د ملي لوبډلې وروستۍ بریاوې ستایلي دي.
نوموړي په خپل اېکس کې لیکلي: ((زه د افغانستان د فوټسال ملي لوبډلې د وروستیو بریاوو او په ځانګړې توګه د قرغیزستان پر وړاندې د نننۍ بریا او د ازبکستان په نړۍوال جام کې د ګډون لپاره د بریا مبارکي وایم.))
د یادولو ده، چې د صلاح الدین رباني په مشرۍ اسلامي جمعیت هم د ۲۰۲۴ کال نړۍوال جام ته د افغانستان د فوټسال د ملي لوبډلې لار موندل ستره بریا او د افغانستان د ورزش په تاریخ کې ښه پېښه بللې ده.
اسلامي جمعیت همداراز په خپل اېکس کې لیکلي: ((په اسيايي سياليو کې د افغانستان د فوټسال لوبډلې بې سارې اتلولي د افغانستان د ورزش په تاريخ کې يوه ښه پېښه ده او دا لومړی ځل دی چې افغانستان د پنځم اسيايي لوبډلې په توګه نړۍوال جام ته لاره پيدا کړه.))
