د قوشتېپې ملي شل اوریز جام سیالۍ نن چهارشنبه (د غویي ۱۲مه ) د کابل نړۍوال کرېکټ لوبغالي کې پیلېږي. ټاکل شوې چې، د دغو سیالیو لومړۍ لوبه نن سهار ۹:۳۰ بجې د بند امیر او بست لوبډلو ترمنځ او دویمه لوبه د ماسپښین ۲بجې د سپینغر او مس عینک لوبډلو ترمنځ ترسره شي.
د دغو سیالیو لپاره هندي مبصر دیوېندر کمار هم کابل ته رسېدلی دی.
ټاکل شوې وه، چې دغه سیالۍ په کندهار ولایت کې پیل شي؛ خو د ځینو امنیتي ستونزو له کبله د دغو لوبو د ځای بدلېدو امله هم لوبې ځنډول شوې وې.
کرېکټ بورډ تر دې وړاندې ویلي و، چې یادې سیالۍ به د اپرېل میاشتې په ۱۶مه په کندهار کې پیل او د همدې میاشتې تر ۲۷مې نېټې به روانې وي.
د افغانستان کرېکټ بورډ د لوبغاړو د غوراوي کمېټې غړو، د ظرفیت لوړونې او د کورني کرېکټ څانګې مشر د وري میاشتې په شلمه نېټه اعلان وکړ، چې یادې سیالۍ د تخنیکي ستونزو له امله د کندهار پر ځای په کابل کې ترسره کېږي.
د کرېکټ بورډ په خبره، دغه سیالۍ به د همدې میاشتې تر ۱۳مې نېټې د کابل ولایت په کرېکټ لوبغالي کې دوام ومومي.
