د قوش تېپې ملي شلاوریز کرېکټ جام سیالیو په لړ کې نن بست زون د سپین غر لوبډلې ته د ۹۸ منډو په توپیر ماتې ورکړه.
ددې سیالیو په ۷مه لوبه کې د بست زون لوبډلې له یوې هر اړخیزې لوبې وروسته سپین غر زون لوبډلې ته په ماتې ورکولو سره په روانو سیالیو کې دویمه پرلپسې بریا خپله کړه.
د افغانستان د کرېکټ بورډ په خبره، په دغو سیالیو کې د بست زون لوبډلې د سپین غر زون پر وړاندې لوبه کې د حضرت الله ځاځي د بهترینې سلیزې پر مټ د درې لوبغاړو په زیان سره ۲۰۶ منډې جوړې کړې.
د نوموړي د ۱۱۶ ناسوځېدلو منډو ترڅنګ نجیب الله ځدراڼ ۲۹، رحمت شاه او نعمان شاه ۲۶-۲۶ منډې جوړې کړې.
له دې سره، د قوش تېپې ملي شل اوریز جام د اتمې لوبې پچه د مس عینک زون لوبډلې ګټلې ده او لومړی یې د امو زون پر وړاندې د توپوهنې پرېکړه کړې.
په دغه جام کې پنځه لوبډلې مس عینک، بند امیر، بُست، امو او سپین غر لوبډلې برخه لري.
ټاکل شوې وه، چې د قوش تېپې ملي شل اوریز جام سیالۍ د کندهار کرېکټ په لوبغالي کې ترسره شي؛ خو د یو شمېر امنیتي ستونزه له امله دا لوبې اوس په کابل کې ترسره کیږي.
د راپورونو له مخې، هر یوه ټيم کې شل لوبغاړي دي او د ملي ټيم لوبغاړي په ټولو ټيمونو کې په مساویانه توګه وېشل شوې دي.
د افغانستان کرېکټ بورډ وايي، چې دغه سیالۍ د نړۍوال جام لپاره د ملي لوبډلې د چمتووالي او ظرفیت لوړولو په موخه ترسره کیږي.