د طالبانو تر کنټرول لاندې د بهرنیو چارو وزارت وايي، چې په مالي او اداري چارو کې د ملګرو ملتونو مشورتي کمېټې ٢١ غړو او د یوناما استازو د طالبانو د بهرنیو چارو له وزیر سره وکتل.
د طالبانو د بهرنیو چارو وزارت د یوې خبرپاڼې په خپرولو سره ویلي، چې په دې کتنه کې په ملګرو ملتونو کې د افغانستان پر استازیتوب، د بشري مرستو پر موثریت او په افغانستان کې د پراختیایي پروژو د ملاتړ په اړه خبرې اترې وشوې.
په خبرپاڼه کې راغلي، چې امیر خان متقي د بهرنیو مرستو په سمې لګونې ټینګار کړی دی.
نوموړي ویلي: "مرستې په داسې ډول باید ولګول شي، چې خلکو ته کار پېدا شي، کورني تولیدات او صنعت وده وکړي او ملګري ملتونه خپلې اړتیاوې له افغان بازارونو څخه پوره کړي، ترڅو د افغانستان د خصوصي سکټور ملاتړ وشي."
په خبرپاڼه کې د متقي له قوله همدا راز زیاته شوې ده، چې دغه ډله نه غواړي افغانان پر بهرنیو مرستو متکي پاتې شي او د لویو پروژو په تطبیق یې ټینګار کړی دی.
په مالي او اداري چارو کې د ملګرو ملتونو د مشورتي کمېټې مشر بچار بونګ عبدالله په دغه کتنه کې ویلي، چې افغانستان یې د سفر موخه د یوناما د چارو ارزونه ده او غواړي د افغان لوري لومړیتوبونه په ګوته کړي، تر څو د ملګرو ملتونو عمومي اسمبلۍ ته يې وړاندیز کړي.
د یادولو ده، چې د طالبانو د بهرنیو چارو وزیر د متوسطو کاروبارونو پر ودې، پراختیایي پروژو ته پاملرنه، بزګرانو ته د بدیل معیشت پر برابرولو او بشري مرستو پورې د محدود پر نه پاتې کېدو ټينګار وکړ.
ټاکل شوې، چې په مالي او اداري چارو کې د ملګرو ملتونو د مشورتي کمېټې ٢١ غړي او د یوناما استازي د هېواد نورو ولایتونو هم سفرونه وکړي.
