اسراییلي ځواکونو د سې شنبې په ورځ د رفح پر پولې بشپړه ولکه ټینګه کړه. سپینې ماڼۍ دغه عملیات «محدود» ګڼلي او ویلې یې دي، چې دا «بشپړ یرغل» نه دی. له حماس سره د اوربند د مذاکراتو سره هممهاله، پر رفح د اسراییل د هر اړخیز یرغل په تړاو اندېښنې په خپل ځای پاتې دي.
د اسوشیېټېډ پرېس د راپور له مخې، د اسراییل لومړی وزیر بنیامین نتنیاهو د دغې پولې نیول یې د حماس د حکومتي او پوځي وړتیاوو د لمنځه وړلو لپاره « مهم ګام» وباله.
د اسراییل د دفاع وزیر یواو ګالانت هم ویلي، چې د یرغملو پر سر د مذاکراتو د ماتې سره به اسراییل پر رفح خپل عملیات «لا ژور» کړي.
په بیروت کې د حماس یوه چارواکي اسامه حمدان ویلي، چې دغه ډله به فشار یا پوځي ګواښونو ته ځواب ورنه کړي او د رفح پر پوله هیڅ یو یرغلګر ځواک نه مني.
د سپینې ماڼۍ د ملي امنیت شورا ویاند جان کربي وایي، چې د رفح په ختیځ کې د غزې او مصر د پولې په اوږدو کې پر دغه ښار بشپړ یرغل نه دی.
هغه ویلي، چې اسراییل «دغه عملیات انډولیز او محدود» ګڼلي چې موخه یې د حماس لهخوا د وسلو د قاچاقو مخنیوی یاد شوی.
له دې سره تېره شپه حماس چارواکو ویلي، چې د اوربند هوکړه لیک یې منلی؛ خو اسراییلي چارواکو بیا ویلي، د دغې هوکړې ګټه د تل ابېب لپاره د منلو نه وو.
همدارنکه کربي د مذاکراتو په اړه هیله مندي څرګنده کړه او ویې ویل، چې اسراییل او حماس « باید وتوانېږي، چې د هوکړې د بشپړېدو لپاره شته تشې» ډکې کړي.
هغه وویل، د سیا مشر ویلیم برنز به په راتلونکو مذاکراتو کې په قاهره کې له اسراییلي، مصر او قطر استازو سره ګډون وکړي.
له هغه وروسته چې اسراییل فلسطینیانو ته امر وکړ؛ چې د رفح له ځینو برخو ووځي، د امریکا ولسمشر جوبایډن یو ځلې بیا نتنیاهو ته پر دغې پولې د اسراییل د یرغل په اړه خبرداری ورکړ.
