پاپ فرانسیس له نړۍوالې ټولنې وغوښتل چې د افغانستان له سېلاب ځپلو سره مرسته وکړي
د نړۍ د کاتولیکانو مشر پاپ فرانسیس له نړۍوالې ټولنې غوښتي چې په افغانستان کې له سېلاب ځپلو سره خپلې مرستې وکړي.
د نړۍ د کاتولیکانو مشر پاپ فرانسیس له نړۍوالې ټولنې غوښتي چې په افغانستان کې له سېلاب ځپلو سره خپلې مرستې وکړي.
پاپ وویل، چې په افغانستان کې د سېلابونو د غمجنو پایلو له امله ژور غمجن شوی دی.
هغه د چهارشنبې په سهار په خپله وینا کې وویل، چې په افغانستان کې د وروستیو ورځو سېلاب ځپلو او په ځانګړې توګه د ماشومانو او د هغوی کورنیو ته دعا کوي.
واتیکان وویل، چې پاپ قرانسیس په دې وینا کې له خلکو او نړۍوالې ټولنې وغوښتل چې په افغانستان کې له سیلاب ځپلو سره د مرستې لپاره اقدام وکړي.
د نړۍ د کاتولیکانو مشر په افغانستان کې د زیاتو کورونو ویجاړیدو ته په اشارې سره وویل، چې نړۍواله ټولنه باید د زیانمنو شویو خلکو د ژغورنې لپاره ژر تر ژره اقدام وکړي.
د راپورونو له مخې؛ سیلابونو او سختو بارانونو د افغانستان په شمال کې یو شمېر کلي ویجاړ کړي او تر اوسه یې تر ۳۱۵ډېر کسان وژلي دي.
تر دې مخکې د ماشومانو د ژغورنې موسسې اعلان کړی و، چې په بغلان کې په وروستیو ورځو کې سیلابونو د ۸۰زره کسانو ژوند اغېزمن کړی او ۱۲زره کورونه یې ویجاړ کړی دی.
د وروستیو شمېرو له مخې په بغلان کې د سېلابونو له امله شاوخوا ۴۰زره ماشومان بې کوره شوي دي.
تر دې وړاندې ایران، ترکیې، قطر، روسیې او یو شمېر مرستندویه بنسټونو د افغانستان له سیلاب ځپلو سره مرستې ته چمتووالی ښودلی دی.
