د طالبانو تر کنټرول لاندې باختر اژانس په خپل خبر کې ويلي، چې په غور ولايت کې د سيلابونو له امله د مړو شمېر ٧٠ تنو ته رسېدلى دى.
په ورته وخت کې په غور کې د طالبانو ځايي چارواکي وايي، چې د دوشنبې په ورځ (د غويي ۳۱مه) د دوی مرستې غور ولایت ته ورسېدې.
باختر خبري اژانس لیکلي، چې په غور کې د زياتو سېلابونو له امله ځیني لارې د ترافیکو پر مخ بندي شوي دي.
د طالبانو تر کنټرول لاندي د دغه رسنۍ د خبر له مخې؛ طالبانو د غور د سېلاب ځپلو سره ۲۰ مېلېونه افغانۍ، ۵ زره کمپلي، ۸۰ خېمې او ۳۲۴ بستې درملو مرسته کړې ده.
د غور ولايت د اطلاعاتو او فرهنګ رييس عبدالحى زعیم وايي، چې د دوشنبې په ورځ دغه ولايت ته بشري مرستې ورسېدې.
د باختر اژانس د خبر له مخې؛ زيانمنو کورنیو ته د دغو مرستو د وېش لړۍ پيل شول.
طالبانو د وروستيو سېلابونو له امله تر اوسه یوازې په غور ولایت کې د شاوخوا ۲ زره کورنو د ویجاړېدو پخلی کړی دی.