د پاکستان کرېکټ لوبډله نن له انګلينډ سره د ۲۰ اوره لوبو د لړۍ دريمه سیالي کوي. دغه لوبه د انګلينډ په کوربه توب د وېلز په مرکز کارديف کې د پاکستان په وخت د ماښام لس نیمې بجې پیلېږي.
د پاکستان او انګلينډ ترمنځ د ۲۰ اوره لوبو لومړۍ سیالي د باران له امله ونه شوه او په دويمه لوبه کې کوربه انګلينډ پاکستان ته د ۲۳ منډو په توپير ماته ورکړه.
د دې لوبلړۍ وروستۍ او څلورمه لوبه د مۍ په ۳۰ نېټه تر سره کيږي.
ځايي سرچینې وايي، د خیبرپښتونخوا خیبر ولسوالۍ د تيرا په ادم خيلو کې د ایف سي ځواکونو پر پوسته په یوه وسله وال برید کې پنځه عسکر وژل شوي او شپږ نور ټپیان دي. ویل کیږي په جګړه کې پنځه وسله وال هم وژل شوي دي.
په سیمه کې سرچینو افغانستان انټرنشنل پښتو ته وويل، چې دغه مخامخ جګړه تېره شپه د (غبرګولي شپږمه) د خیبر ولسوالۍ د تېرا په ادم خيلو کې د پاکستان پوله ساتو ځواکونو یا ایف سي پر پوسته د یوې ډلې وسله والو لخوا شوې چې په پایله کې یې د ایف سي پنځه عسکر وژل شوي او شپږ ټپیان دي.
په دغې جګړه کې تر اوسه پورې د شپږو وسله والو د وژل کېدو خبره هم کیږي.
د دغه برید مسوولیت د ټي ټي پي وسله والې ډلې منلی او ادعا یې کړې چې د پاکستان پوځ ګڼ عسکر یې وژلي او ټبیان کړي دي.
په پاکستان کې د لشکر اسلام وسله والې ډلې هم په یوه بیان کې ویلي چې له ټي ټي پي سره یې په ګډه دغه برید کړی او پاکستاني پوځ ته یې ګڼه مرګ ژوبله اړولې ده.
تر اوسه پورې پاکستاني پوځ په دې اړه څه نه دي ویلي خو د دغه پوځ د خواله رسنیو ځینو ادرسونو د جګړې خبره کړې او د مرګ ژوبلې شمېرې یې نه دي خپرې کړې.
ځینې نور نا تایید شوي خبرونه وايي، چې په دغه برید کې د پاکستان د پوځ ۱۱ عسکرو ته مرګ ژوبله اوښتې.
د خیبرپښتونخوا په خیبر دره کې اوس همد لشکر اسلام منګل باغ وسله واله ډله فعالیت کوي، دغه ډله په سیمه کې په سخت دریځۍ او ترهګرۍ پیژندل شوې ډله یادیږي.
د دغه لیګ په پایلوبه کې د کلکتې لوبډلې پیلیز توپ وهونکی افغان لوبغاړي رحمان الله ګربز د پام وړ لوبه تر سره کړه. د کلکته نايټ رایډرز او سنرایزر حیدراباد لوبډلو تر منځ د هند غوره لیګ پایلوبه تېره ورځ په ماچیمدرام لوبغالي کې تر سره شوه.
د هند غوره لیګ د اتلولۍ جام د کلکتې لوبډلې له لس کلن انتظار وروسته د دریم ځل لپاره په خپل نوم کړ.
د دغه لیګ د اتلولۍ جام په ۲۰۱۲ او ۲۰۱۴ کلونو کې د ګاتم ګامبیر په لوبډلمشرۍ د کلکتې لوبډلې ګټلی و.
په ۲۰۲۴ کال کې د هند په ای پي اېل سیالیو کې ککلتې لوبډلې د نورو لوبډلو سره سختې سیالۍ ترسره کړې او په لوبډله کې د غوره توپ وهونکو او غوره توپ اچونکو په مټ یې ځان تر اتلولۍ ورساوه.
د کلکتې لوبډلې له لوري د هند غوره لیګ د اتلولۍ د وروستۍ لوبې په ګټلو کې د یادې لوبډلې د پیلیز توپ وهونکي رحمان الله ګربز توپ وهنه د لوبډلې د بري لپاره د پام وړ وه.
رحمان الله ګربز ته په دغې پایلوبه کې د ډېرو څلوریزو وهلو جایزه هم ورکړل شوه.
پاکستاني چارواکو ویلي چې د تحریک طالبان پاکستان ۱۱غړي یې پر چینايي انجنیرانو د شوي ځانمرګي برید په تړاو نیولي دي. د پاکستان دوو لوړپوړو چارواکو د یکشنبې په ورځ لاهور کې رسنیو ته ویلي چې له نیول شوې ډلې ځينې اسناد هم په لاس ورغلي دي.
د رویټرز د راپور له مخې دغه خبر د پاکستان د ترهگرۍ پر ضد د مبارزې ادارې مشر رای طاهر او د کورنیو چارو وزیر محسن نقوي په یوه خبري کنفرانس کې په ډاګه کړ.
رای طاهر د یکشنبې ورځ د (غبرګولي شپږمه) رسنیو ته ویلي، «هغه ګرځنده ټیلیفون چې ځانمرګي بریدګر له خپلو سیمه ییزو ملګرو سره د اړیکې لپاره کارولی و د نورو شکمنو کسانو د نیولو لامل شو.»
ښاغلی طاهر زیاتوي چې، څېړنې او اسناد دا ډاګیز کوي چې «وسله والو په افغانستان کې د تحريک طالبان پاکستان له مشرانو څخه امر اخيست.»
ټيټيپي تر اوسه پورې په دې اړه څه نه دي ویلي.
د طالبانو دفاع وزارت هغه مهال ویلي و چې، د افغانستان خاوره د پاکستان پر ضد نه کارول کیږي او ویلي یې و، د خیبرپښتنخوا هغه سیمه چې چینايي وګړي پکې په نښه شوي، د پاکستاني پوځ تر کلک امنیتي پوښښ لاندې ده. او د پاکستاني چارواکو دا ډول څرګندونې یې له مسوولیت څخه د هغوی تېښته بللې وه.
د پاکستان کورنیو چارو وزیر د یکشنبې په ورځ وویل چې پاکستاني طالبان په دغه هیواد کې د پنځو چینايي انجینرانو د وژنې مسوول دي. محسن نقوي د طالبانو له حکومته وغوښتل چې د«دوستانه اړیکو د ساتلو لپاره» دې د نور ولي محسود په ګډون د ټيټيپي مشران پاکستان ته ور وسپاري.
د مارچ په ۲۶مه د خیبرپښتونخوا په بشام سیمه کې د چینايي انجینرانو پر کاروان یوه ځانمرګي بریدګر د پنځو چینايي انجینرانو په ګډون شپږ کسان ووژل.
پاکستاني طالبانو په دې پېښه کې لاس لرل رد کړي دي.
د پاکستان کورنیو چارو وزیر په لاهور کې په یوه خبري غونډه کې طالبانو ته په وینا کې وویل: «موږ د طالبانو له موقت حکومت څخه غواړو چې د نور ولي محسود په ګډون د تحریک طالبان پاکستان مشران ونیسي او پاکستان ته یې وسپاري. چې د دواړو هېوادونو ترمنځ دوستانه اړیکې وساتل شي.»
د طالبانو حکومت د پاکستاني طالبانو د مشرانو او غړو د شړلو او پاکستان ته د ورسپارلو په اړه د اسلام اباد غوښتنه رد کړې ده. دغه راز طالبانو د ټي ټي پي د هرکلي ترڅنګ په خيبرپښتونخوا کې د پاکستاني طالبانو د وسله والو فعاليتونو مسووليت هم رد کړی او دغه ډله يې د پاکستان کورنۍ ستونزه بللې ده.
نقوي وويل، په بشام کې پر چينايي وګړود بريد تر شا د تحريک طالبان پاکستان لاس و او په تړاو يې ترهګر نيول شوي دي.
هغه وویل: «موږ په دې قضیه کې داسې اسناد لرو چې منکرېدل ترې ناشوني دي.»
نقوي خبرداری ورکړ چې «ترهګر د افغانستان د موقت حکومت (طالبانو) له کمزورۍ ګټه پورته کوي او له ډیورنډ کرښې هاخوا د پاکستان امنیت ته ستونزې جوړوي.»
د پاکستان کورنیو چارو وزیر د دغو بریدونو په غبرګون کې ویلي، چې دوی د دواړو هېوادونو تر منځ پر ډیورنډ کرښه څارنه ګړندۍ کړې ده.
نن د هند په سوداګریز لیګ کې د حیدراباد او کلکتې لوبډلو تر منځ د لیګ وروستۍ لوبه ترسره کیږي. دغه جام دوه ځله کلکتې او یو ځل حیدراباد لوبډلې ګټلی دی.
نن یک شنبه د (غبرګولي شپږمه) د هند شل اوریز سوداګریز لیګ (ای پې اېل) پایلوبه ترسره کیږي.
دغه پایلوبه د کلکتې او حیدراباد لوبډلو تر منځ په ماچیمدرام لوبغاړي کې ترسره کیږي.
په دواړو لوبډلو کې د نړۍ د کرېکټ پېژندل شوي ستوري لوبیږي.
د کلکتې لوبډله چې د بالیوډ د پېژندل شوي ستوري شاه رخ خان ده د رحمان الله ګربز او الله محمد غضنفر په ګډون میچل سټارک، انډري راسل، شریاس ایر، ونکتیش ایر په ګډون نوم لرونکو لوبغاړو تر پایلوبي راورسوله.
بلخوا د سنرایزر حیدراباد لوبډله بیا د یوې هندۍ سوداګرې ده.
په یاده لوبډله کې راهول ټریپاټي، هاینریک کلاسن، پټ کامینز نتیش کمار په شان د کرېکټ د نړۍ مشهور لوبغاړي پکې لوبیږي.
د ای پې اېل جام په ۲۰۰۸ کال کې پیل شوی او تر دې مهاله د مهیندرا سینګ ډهوني په لوبډلمشرۍ د چینای سوپر کینګز لوبډلې او ممبۍ اینډینز لوبډلې پنځه پنځه ځلي په خپل نوم کړی دی.