په بغلان ولایت کې د طالبانو د کلیو او پراختیا ریاست چارواکي وایي، چې په دغه ولایت کې وروستیو سېلابونو د اوبو ۳۰۰ سرچینې ویجاړې کړي دي. د طالبانو په خبره؛ د اوبو ډېری سرچینې د یاد ولایت په برکه او مرکزي بغلان ولسوالیو کې ویجاړې شوې دي.
د طالبانو تر واک لاندې باختر خبري اژانس د چهارشنبې په ورځ د بغلان د سیمه ییزو چارواکو له قوله راپور ورکړی، چې په دې ولایت کې لسګونه څاه ګانې، چینې او د اوبو رسولو شبکې له منځه تللي دي.
په بغلان ولایت کې د طالبانو د کلیو او پراختیا ریاست یوه چارواکي ویلي، چې د اوبو ویجاړې شوې سرچینې پېژندل شوي او د رغولو چارې به یې د مرستندویه ادارو په هممکارۍ پیل شي.
د افغانستان په یو شمېر ولایتونو په ځانګړي توګه بیا په بغلان کې وروستیو سېلابونو او بارانونو د سیمې خلکو ته سخت ځاني او مالي تاوانونه اړولي دي.
د راپورونو له مخې؛ ویل کیږي چې په دې ولایت کې څه باندې ۳۰۰ کسانو ژوند له لاسه ورکړی او سلګونه نور ټپيان شوي دي.
ملګري ملتونه وایي، چې د افغانستان خلک له څو کلنو پر له پسې وچکالیو وروسته د سېلابونو په شان له سختو طبیعي پېښو سره مخ شوي دي.
په دې وروستیو کې د خوړو نړۍوال پروګرام ویلي وو، چې د افغانستان په شمال کې سېلابونو تر ۸۰ زره ډېر کسان اغېزمن کړي او د سېلاب ځپلو سیمو د بیارغونې لپاره ۱۴ میلیونه ډالرو ته اړتیا ده.
