فلسطیني رسنیو د پنجشنبې په ورځ خبر ورکړی، په غزه کې پر یوه ښوونځي د اسراییلي الوتکو د برید له امله ۳۲ تنه هغه پناه غوښتونکي وژل شوي او لسګونه نور ټپیان شوي چې له نورو سیمو څخه دلته د خوندي پاتې کېدو لپاره مېشت شوي وو.
اسراییلي پوځ بیا ویلي، چې په دغه ښوونځي کې د حماس ډلې مرکز و.
د حماس د رسنیو د برخې یو چارواکي بیا د اسراییل پوځ دا خبره رد کړې، چې ګواکې په دغه ښوونځي کې د دوی پوځي مرکز و.
هغه اسرایيل په «دروغ ویلو» او «له ځانه په جوړو شویو داستانونو» تورن کړل او ویې ویل، چې هغوی غواړي په دغسې خبرو پر «لسګونو بېځایه شویو» خلکو د خپلو بریدونو لپاره پلمې جوړې کړي.
د اسراییل پوځ ویلي، چې دوی له هوايي بریده مخکې هغوی ولسي خلکو ته د زیانونو اړولو پر کمولو لازم ګامونه اخیستي وو.
دغه برید له هغه وروسته شوی، چې اسراییلي پوځ ویلي و د غزې په مرکز کې نوي پوڅي عملیات پیلوي.
په غزه کې د روغتیا وزارت د مالوماتو له مخې، د اسراییل له بریدونو وروسته تر دې مهاله ۳۶ زره ۵۰۰ تنه وژل شوي دي.
دغه بریدونه د اکټوبر په اوومه له هغه وروسته پيل شول، چې حماس پر اسراییل برید وکړ ۱۲۰۰ تنه یې ووژل او ۲۵۳ تنه نور یې یرغمل کړل.
