طالبان: په ۲ ولایتونو کې د بېلابېلو جرمونو په تور ۳۲ کسان نیول شوي دي

AP ۱۴۰۳ غبرگولی ۲۲

د طالبانو د کورنیو چارو وزارت وايي، په نيمروز او کندوز کې یې ۳۲کسان د غلا، قاچاق، قمار وهلو، له جواز پرته د وسلو ګرځولو، عامه نظم ګډوډولو او «اخلاقي فساد» په تور نیولي دي.

د طالبانو د کورنیو چارو وزارت نن په یوه خبرپاڼه کې لیکلي، چې په نیمروز ولایت کې ۱۲تنه د خوراکي او غیر خوراکي توکو د قاچاق، درې تنه د غلا او یو کس د خلګو د ځورونې په تور نیول شوي دي.

دغه وزارت همداراز په کندوز کې د غلا، قمار، عامه نظم ګډوډولو، له جواز پرته د وسلو ګرځولو او د «اخلاقي فساد» په تور د ۱۶کسانو د نیولو خبر هم ورکړی.

په افغانستان کې د طالبانو واک ته له رسېدو سره، د بېکارۍ او بې وزلۍ له امله جنايي جرمونه او د غلا پېښې زياتې شوې دي.

پر همدې مهال د طالبانو د خلکو په خپل سر نیولو، په زندانونو کې د بندیانو له حقونو د سرغړونې او شکنجې راپورونه هم ورکړل شوي دي.

د نړۍ د نفوسو د سروې له مخې افغانستان په ۲۰۲۳کال کې د جرمونو د کچې له مخې په نړۍ کې څلورم ځای لري.

نور خبرونه

رادیو