د عراق د ملي امنیت ادارې د سې شنبه په ورځ اعلان وکړ، چې د دغه هېواد امنیتي ځواکونو په سوریه کې د داعش ډلې هغه لوړپوړی غړی وژلی، چې د عراق پر دولتي ځواکونو د بریدونو مسوول و. د دغې ادارې په خبره؛ عراقي وګړی ابو زینب د سوریې په رقه ښار کې وژل شوی دی.
د عراق د ملي امنیت په بیانیه کې راغلي، چې د داعش ډلې یاد غړی د امریکا په مشرۍ د ایتلافي ځواکونو په همکارۍ وژل شوی دی.
د داعش ضد د ایتلافي ځواکونو ویاند بیا د دغه عملیاتو په اړه څه نه دي ویلي.
د امریکا په مشرۍ ایتلاف د عراق د امنیتي ځواکونو او د سوریې د کرد ډېموکراټیکو ځواکونو سره د اسلامي دولت د ډلې د پاتې شونو پر وړاندې همکاري کوي.
داعش ډله په ۲۰۱۷ کال کې په عراق کې ماته شوه؛ خو پاتې شوني یې د عراقي پولیسو، پوځ او حکومتي ملېشو پر وړاندې بریدونه ترسره کوي.
