د کندهار سیمهییز طالب چارواکي: په سپین بولدک ولسوالۍ کې مو ۱۲ تنو ته تعزیزي سزا ورکړه
د کندهار ولایت د رسنیو دفتر له لوري خپره شوې خبرپاڼه کې ویل شوي، چې تېره ورځ یې د یاد ولایت په سپین بولدک ولسوالۍ کې ۱۲ تنو تورنو کسانو ته په عام محضر کې تعزیزي سزا ورکړې ده.
د کندهار ولایت مقام د رسنیو دفتر له لوري په خپره شوې خبرپاڼه کې لیکل شوي، چې د سه شنبې په ورځ د (غبرګولي ۲۲مه) نېټه یې د یاد ولایت په سپین بولدک ولسوالۍ کې د لومړنۍ محکمې له لوري ۱۲ تنه تورن کسان په عام محضر کې په دورو ووهل شول.
د ولایت له لوري په خپره شوې خبرپاڼه کې ویل شوي، چې یاد دوولس تنه د غلا، زنا او لواطت په تور نیول شوي وو.
په خبر پاڼه کې د تورنو کسانو د هویت په اړه څه نه دي ویل شوي.
یادو کسانو ته د سزا ورکولو پر مهال طالبانو د سپین بولدک ولسوالۍ ګڼ اوسېدونکي راټول کړي وو.
که څه هم په عام محضر کې د سزا د حکم پلي کېدل له بشري حقونو سرغړونه بلل کېږي؛ خو طالبان وايي په تورنو کسانو شرعي حکم عملي کوي.
طالبان پر داسې مهال په یو شمېر ولایتونو کې په عام محضر کې تورنو کسانو ته د سزا ورکولو لړۍ ته دوام ورکړی، چې د طالبانو دغه پرېکړه په وار، وار د نړۍوالې ټولنې له لوري په کلکه غندل شوې ده.
