ایران: طالبانو هغو ایراني موټر چلوونکو ته اجازه نده ورکړې چې مشهد کې یې ویزې اخیستې وې
طالبانو هغه موټر چلوونکي د افغانستان خاورې ته نه دي پرېښي، چې په دې وروستیو کې یې په مشهد کې له افغان قونسلګرۍ وېزې اخیستې وې.
طالبانو هغه موټر چلوونکي د افغانستان خاورې ته نه دي پرېښي، چې په دې وروستیو کې یې په مشهد کې له افغان قونسلګرۍ وېزې اخیستې وې.
د ایران د اېسنا خبري اژانس راپور ورکړی چې، د رضوي خراسان ولایت د نۍیوالو ټرانسپورټي شرکتونو ټولنې ورته ویلي چې طالبانو هغو ایراني موټر چلوونکو ته چې ویزې لري افغانستان ته د ننوتو اجازه نه ده ورکړې.
د دغې ټولنې مرستیال محمود امتي اېسنا ته ویلي: داسې ښکاري، چې د ځینو کورنیو ستونزو له امله په مشهد کې د افغانستان په کونسلګرۍ کې اختلافات رامنځ ته شوي او طالبانو موټر چلوونکو ته ویلي چې په مشهد کې د افغانستان د جنرال کونسل جابر انصار ماموریت پای ته رسېدلی او هغه نور د ویزو ورکولو قانوني واک نه لري.
عبدالجابر انصار د افغانستان د تېر حکومت لهخوا په مشهد کې د افغانستان قونسل ګومارل شوی و، چې طالبان وایي په دې وروستیو کې یې په فساد کې د ښکېلتیا له امله له دندې ګوښه کړی دی.
خو ښاغلي انصار رسنیو ته ویلي، چې هغه د طالبانو لهخوا پر دندې نه دی ګومارل شوی او د لرې کولو واک یې هم طالبان نه لري.
ایران یو د هغو ګوتو په شمېر هېوادونو څخه دی، چې په تهران کې یې د افغانستان سفارت طالبانو ته سپارلی او د طالبانو ډیپلوماټان یې هم منلي دي.
تر دې وړاندې د ایران د بهرنیو چارو وزارت ویاند هم د ښاغلي انصار په بدلولو غبرګون ښودلی و او له طالبانو یې غوښتي و، چې ټولې ډیپلوماټیکي چارې دې د نړۍوالو قوانینو په رڼا کې هوارې کړي.
د طالبانو د لوړو زده کړو وزارت د رسنيو دفتر د سې شنبې په ورځ (د غبرګولي ۲۲مه) پر اېکس پاڼه د کازان په غونډه کې د طالب وزير ندا محمد نديم د خبرو يوه برخه نشر کړې.
دغه طالب وزير ويلي، چې دوی له نړۍ سره « د اسلام د لارښوونو سره سم مثبت تعامل ته چمتو او لېوال دي.»
نديم که څه هم د کوم هېواد نوم یاد نه کړ؛ خو زياته يې کړه، چې ځيني هېوادونه اوس هم د خپلو «شمو اهداف» څخه لاس نه دی اخیستی او د دوی په کورنيو چارو کې مداخله کوي.
په افغانستان کې واک ته د طالبانو له رسېدو وروسته ډېر وخت د دې ډلې مشران پر پاکستان نيوکې کوي، چې د دوی په کورنيو چارو کې مداخلې کوي.
د طالبانو د لوړو زده کړو وزير ندا محمد نديم د خپلو خبرو په یوې بله برخه کې ويلي، چې دوی د «داعش او نورو تخريب کوونکو کړيو» د له منځه وړلو سره هم مبارزه کړې ده.
نوموړی په دې اړه زياتوي: « موږ د خوارجو لکه داعش او ورته مخربو کړيو سره په کلک عزم مبارزه کړې او کوو يې او په ټول هېواد کې مو د دوی ځالي له منځه وړي دي.»
د طالبانو د لوړو زده کړو او پوهنې وزیرانو د عالي تحصیلاتو او پوهنې وزیرانو په نړۍواله څلور ورځنۍ ناسته کې د ګدون لپاره د روسیې کازان ښار تللي.
د طالبانو لوړو زده کړو وزارت د معلوماتو له مخې، چې د دوی دغه دوو مسوولینو په یاده غونډه کې د ګډون تر څنګ په روسيه کې له افغان محصلينو سره هم کتلي او هلته یې د عالي تحصیلاتو له مرکزونو او نندارتون څخه هم ليدنې کړي دي.
