سرچینې: کابل میشتي طالبان د ملاهبت الله له فرمانونو ناخوښه دي

د طالبانو د سترې محکمې له لوري د دوشنبې په ورځ د (تلې ۳۰مه) په یوه خپره کړې خبرپاڼه کې لیکلي، چې څلور ورځې وړاندې یې د لوګر ولایت په خروار ولسوالۍ د لومړنۍ محکمې له لوريیوه ښځه او یو نارینه د «نامشروع» اړیکو په تور په دورو وهلي او د بند سزا یې ورکړې ده.

په خپرپاڼه کې لیکل شوي، چې تورنه ښځه یې ۳۵ دورې وهلې او څلور میاشتې بند سزا یې ورکړې او همدارنګه تورن نارینه یې د ۳۹ دورو وهلو تر څنګ د څلورو میاشتو په بند سزا محکوم کړی.

خبرپاڼه زیاتوي، چې د تعزیري سزا دغه حکم یې د طالبانو د سترې محکمې له تایید وروسته پر تورنو کسانو پلی کړی.

که څه هم نړۍواله ټولنه او د بشري حقونو د ملاتړو سازمانونو له لوري په عام محضر کې د طالبانو سزا ورکولو ته سخت غبرګونونه ښودل شوي، خو دغې ډلې له خپلو کړنو لاس نه دی اخیستی او نږدې هره ورځ تورنو کسانو ته په عام محضر کې بدني سزاګانې ورکوي.

ځايي سرچینو افغانستان انټرنشنل ـ پښتو ته ویلي، چې د پوهنتون استاد او د سیاسي چارو کار پوه جاوید مومند درې ورځې وړاندې د یو شمېر طالبانو له لوري ونیول شو او نامعلوم لوري ته وړل شوی.

جاوید مومند پنځه ورځې وړاندې پر خواله رسنیو کې له خپلو ادرسونو په یوه ویډیويي پیغام کې ویلي و، چې د طالبانو له لوري پر ټلویزیون له سیاسي بحثونو څخه منعه شوی دی.

هغه ته نږدې سرچینې وايي، چې نوموړی طالبانو نیولی او دوی ته نور معلومات نه شته چې چیرې یې وړی دی.

نوموړي پنځه ورځې وړاندې پر ټولنیزو رسنیو په یوه ویډیو کې د ایراني عسکرو له لوري د افغانانو وژلو ته سخت غبرګون ښودلی و.

دا په داسې حال کې ده، چې له تېرو څو ورځو راهیسي پر ټولنیزو رسنیو د طالبانو فعالو او مشهورو کسانو د جاوید مومند د نیولو کمپاین پیل کړی.

طالبانو تر اوسه پورې د پوهنتون د استاد او سیاسي چارو شنونکي جاوید مومند د نیولو په اړه څه نه دي ویلي.

د افغانستان د ازادۍ جبهې د دوشنبې په ورځ د (تلې ۳۰مه) د یوې خبرپاڼې په خپرولو سره پر کابل هوايي ډګر د تېرې شپې توغندیز بریدونو مسوولیت په غاړه اخیستی او طالبانو ته یې د مرګ ژوبلې اړولو دعوه کړې ده.

د دغې جبهې له لوري په خپره شوي خبرپاڼه کې لیکل شوي، چې تر توغندیز بریدونو وروسته یو شمېر کسان د هوايي ډګر نظامي سیمو ته ننوتي او طالبانو ته تر ځاني او مالي زیان اړولو وروسته بېرته له هوايي ډګره وتلي دي.

همدارنګه په خبرپاڼه کې ویل شوي، چې یاد عملیات یې د طالبانو د هغه پلان شنډولو په موخه ترسره کړي، چې طالبانو غوښتل یو شمېر پخوانۍ جنګي الوتکې جوړې کړي او بیا یې د افغانانو پر ضد وکاروي.

د ازادۍ جبهه وايي، موخه یې په افغانستان کې د قانوني نظام رامنځته کول دي او غواړي افغانان د طالبانو له ظلمونو څخه وساتي.

طالبانو تر اوسه پورې پر کابل هوايي ډګر د توغندیزو بریدونو په اړه څه نه دي ویلي.

د طالبانو تر واک لاندې ملي ټلویزیون خبر ورکړی، چې د طالبانو حکومت د امو سیند په نفتي حوزه کې د تېلو ایستلو ۲۵ نوې څاګانې فعالوي.

هلته دمګړۍ د تېلو ایستلو ۲۴ څاګانې فعاله دي او هره ورځ ۱۳۵۰ ټنه تېل ترې تولیدیږي.

د طالبانو د ویاند مرستیال حمدالله فطرت ملي ټلویزیون ته ویلي دي، چې د نویو څاګانو په فعالېدو سره به په دغې حوزه کې د نفتو تولید له دوو څخه تر دریو زرو ټنو پورې لوړ شي.

ښاغلی فطرت زیاتوي: «د کانونو او پټرولیم وزارت پلان لري، چې سږکال ۲۵ نورې څاګانې فعالې کړي، له دغې ډلې ۱۸ نوې کېندل کیږي، دوه به اکتشاف شي او پنځه به پخوانۍ څاګانې ورغول شي.»

نوموړي ویلي دي، چې د امو سیند نفتي حوزې استخراج شوي نفت به په هېواد کې دننه پروسس کیږي.

په افغانستان کې د اړتیا پوره کولو تېلو ډیره برخه یې له ایران څخه واردیږي.

خو ډیری کسان شکایت کوي، چې د ایران د تېلو یو شمېر کمپنۍ او افغان سوداګر د ټیټ کیفیت تېل افغانستان ته واردوي.

په کابل کې د چین سفارت په دې اړه په رسمي ډول څه دي ویلي.

د طالبانو د اوبو او برېښنا وزارت له لوري په خپره شوې خبرپاڼه کې لیکل شوي، چې د دغې ډلې د اوبو او برېښنا وزیر عبدالطیف منصور او په کابل کې د چین سفیر په بامیان ولایت کې د لمریزې تولیدي برېښنا له پروژې څخه لیدنه کړې ده.

په خبرپاڼه کې د عبدالطیف منصور له قوله لیکل شوي، چې د یادې پروژې په اړه لومړنۍ څیړنې پای ته رسیدلې او د چین هېواد په مرسته به یې عملي چارې پیل شي.

همدارنګه د بامیانو والي ویلي، چې د دغه ولایت اوسیدونکي بريښنا ته جدي اړتیا لري او تمه لري، چې یاده پروژه ژر پیل شي.

په خبرپاڼه کې د چین د سفیر له قوله لیکل شوي، چې دغه هېواد په بامیان ولایت کې د لمریزې تولیدي بریښنا د پروژې پلي کېدو ته ژمن دی.

د چین او طالبانو تر منځ اړیکې د نورو هېوادونو پرتله خورا نږدې دي. تر اوسه پورې طالبانو په افغانستان کې د کاني زیرمو د ایستلو ګڼ تړونونه د دغه هېواد له شرکتونو سره کړي دي.

خو لا هم دغه هېواد نه دی چمتو شوی چې د دغېډلې حکومت په رسمیت و پيژني.